Rossiyaliklar super yaxtalar soni bo‘yicha dunyoda birinchi o‘rinni egalladi

Rossiyaliklar dunyo bo‘yicha eng ko‘p super yaxtalarga ega ekanligi aniqlandi. Bu haqda Boat International nashri ma’lumotiga tayanib, “RBK” xabar beradi.

Nashrning ma’lumotlariga ko‘ra, egalari ma’lum bo‘lgan 101 ta kemadan 18 tasi rossiyaliklarga tegishlidir.

Ikkinchi o‘rindan 16 ta super yaxtaga ega amerikaliklar, uchinchi o‘rindan esa o‘nta super yaxta sohibiga ega Saudiya Arabistoni joy oldi. Shuningdek, Boat International nashri ma’lumotiga ko‘ra, Gretsiya (6), Ukraina (3), Hindiston (3), Dubay (5), Abu-Dabi (4), Qatar (4) va Ummon (2) fuqarolari bittadan ortiq super yaxtaga ega.

Nashr muharriri Styuart Kempbellning ma’lum qilishicha, 2015-yilda 55 ta super yaxta qurilgan bo‘lib, bu o‘tgan yilgidan 17 foizga ortiqdir.

Kempbellning so‘zlariga qaraganda, 2016-yilda har qachongidan ham yirik super yaxta Project Omar’ning suvga tushirilishi kutilmoqda. The Times’ning ta’kidlashicha, ushbu yaxta milliarder Alisher Usmonovning buyurtmasi asosida barpo etilmoqda.