Россияликлар супер яхталар сони бўйича дунёда биринчи ўринни эгаллади

Россияликлар дунё бўйича энг кўп супер яхталарга эга эканлиги аниқланди. Бу ҳақда Boat International нашри маълумотига таяниб, «РБК» хабар беради.

Нашрнинг маълумотларига кўра, эгалари маълум бўлган 101 та кемадан 18 таси россияликларга тегишлидир.

Иккинчи ўриндан 16 та супер яхтага эга америкаликлар, учинчи ўриндан эса ўнта супер яхта соҳибига эга Саудия Арабистони жой олди. Шунингдек, Boat International нашри маълумотига кўра, Греция (6), Украина (3), Ҳиндистон (3), Дубай (5), Абу-Даби (4), Қатар (4) ва Уммон (2) фуқаролари биттадан ортиқ супер яхтага эга.

Нашр муҳаррири Стюарт Кэмпбеллнинг маълум қилишича, 2015 йилда 55 та супер яхта қурилган бўлиб, бу ўтган йилгидан 17 фоизга ортиқдир.

Кэмпбеллнинг сўзларига қараганда, 2016 йилда ҳар қачонгидан ҳам йирик супер яхта Project Omar’нинг сувга туширилиши кутилмоқда. The Times’нинг таъкидлашича, ушбу яхта миллиардер Алишер Усмоновнинг буюртмаси асосида барпо этилмоқда.