iPhone foydalanuvchisi Apple kompaniyasini sudga berib, undan bir necha million dollarlik tovon puli talab qildi, deya xabar bermoqda “Hi-tech.mail.ru”.
AQShning Arizona shtatida yashovchi Vilyam B. Kottrell arizasida yozishicha, iOS 9 operatsion tizimida mobil trafik chiqimi sezilarli darajada ko‘paygan. Bunga yangi “Wi-Fi yordam” funksiyasi sabab bo‘lgan. Ushbu funksiya iPhone Wi-Fi interneti tezligi yetarli emas, deb hisoblasa, 3G yoki 4G’ga avtomatik ravishda o‘tishi uchun mo‘ljallangan.
U 3G yoki 4G’ga o‘tish noaniqligini ta’kidladi. Shuningdek, u kompaniya mobil trafik sarflanishi natijasida yuzaga keladigan xarajat qanchalik katta bo‘lishi haqida ataylab foydalanuvchilarni xabardor qilmasligini aytmoqda. Shu tufayli u 5 million dollar tovon puli talab qildi.
Eslatib o‘tamiz, agar mobil internetingiz cheksiz bo‘lmasa, ushbu funksiyani o‘chirib qo‘yish tavsiya etiladi. Aks holda kattagina xarajat kelib chiqadi. Bunda gap Wi-Fi Assist (“Wi-Fi yordam”) funksiyasi haqida bormoqda, u iPhone 6/6s/5/5s’da yoniq holda bo‘ladi.
Hisobingizdagi pul katta tezlik bilan sarf bo‘lib ketishining oldini olish uchun telefon sozlamalariga kirib, “Uyali aloqa” bandini tanlang. U yerda “Wi-Fi yordam” funksiyasini topib, uni o‘chiring.
Izoh (0)