16-sentabr kuni O‘zbekistonda Xalqaro ozon qatlamini muhofaza qilish kuniga bag‘ishlab “Ozon – ultrabinafsha nurlaridan bizning yagona himoyachimiz” shiori ostida tadbirlar o‘tkazildi. Bu haqda UzDaily xabar bermoqda.
Tabiatni muhofaza qilish davlat qo‘mitasi, BMT Taraqqiyot dasturi, Global ekologik fondi hamda O‘zbekiston Ekologik harakati hamkorligida Toshkent shahrida tashkil etilgan tadbirda O‘zbekistonda atrof-muhit barqarorligini saqlash, tabiat ne’matlaridan to‘g‘ri va oqilona foydalanish, ularni asrab-avaylashga alohida e’tibor qaratilayotgani ta’kidlandi.
O‘zAning yozishicha, O‘zbekiston ozon qatlamini muhofaza qilish masalasining dolzarbligi, uning yemirilishi yosh avlod salomatligiga xavf solishini inobatga olib, 1993-yilda Ozon qatlamini himoya qilish to‘g‘risidagi Vena konvensiyasi va Ozon qatlamini buzuvchi moddalarga doir Monreal protokoliga qo‘shilgan.
Seminarda O‘zbekistonda ozon qatlamini yemiruvchi moddalar ishlatilishini taqiqlash bo‘yicha qabul qilingan milliy dastur ijrosi hamda Global ekologik fondning qiymati qariyb 3,4 million dollarga teng beshta loyihasi samarasida sohada ijobiy yutuqlarga erishilayotgani qayd etildi.
Tadbir doirasida maktab o‘quvchilari o‘rtasida ona tabiatni asrab-avaylashga qaratilgan «Ozzi-ozon» o‘yini, ekologiya muammolari tasvirlangan rasm va fotolar tanlovi hamda sport musobaqasi o‘tkazildi. G‘oliblarga esdalik sovg‘alari topshirildi.
Izoh (0)