Geografik obyektlarga nom berish va ularning nomini o‘zgartirish masalalari bo‘yicha Toshkent shahar komissiyasi 16-iyun kuni Toshkent shahar hokimi qaroriga binoan o‘zgartirilgan metro bekatlari nomlariga izoh berdi, deb xabar bermoqda “Gazeta.uz”.
Eslatib o‘tamiz, metroning “Chilonzor” yo‘lida joylashgan “Hamza” bekati nomi “Novza” deb, “Yunusobod” yo‘lida joylashgan “Habib Abdullayev” bekati nomi “Shahriston” deb o‘zgartirilgan edi.
Komissiya xabarida aytilishicha, Novza — joyning tarixiy nomi hisoblanadi. Qadimda bu joydan o‘tadigan Bo‘zsuv kanali irmog‘iga to‘g‘on qurilib, balandlikdagi bo‘sh yotgan yerlarda bog‘-rog‘lar yaratilib, ekinzor dalalarga nov (to‘g‘on) orqali suv chiqarilgan. Shu munosabat bilan bu joy va uning yaqin-atrofdagi yerlar va mahalla “Novza”, ya’ni nov orqali suv chiqarilib obod qilingan joy deb atalgan. Ayni paytda Chilonzor tumani hududida joylashgan ushbu hududda shu nomdagi mahalla, ko‘cha, bekat, savdo majmuasi va masjid bor.
Shahriston ham joyning tarixiy nomi hisoblanadi. Obod shahar ma’nosini anglatadi. Qadimda bog‘-rog‘ hududi bo‘lgan. Shahar aholisini meva va sabzavot ekinlarini bilan ta’minlashda muhim o‘rin tutgan. O‘tgan asrning birinchi yarmida bu joy shahar hududiga qo‘shilib, shaxsiy va ko‘p-qavatli turar joy binolari hamda ma’muriy inshootlar, keng va ravon yo‘llar bunyod etildi. Shahar aholisi orasida bu joy shu nom bilan ma’lum va mashhur. Bu joydagi metro bekatining loyihadagi nomi shu nom bilan yuritilgan. Ayni paytda Yunusubod tumanining markaziy hududida joylashgan ushbu hududda shu nomli chorraha, savdo majmuasi, bekat, mahalla va ko‘cha mavjud.
Izoh (0)