Malayziyada qochoqlarning ommaviy qabristonlari topildi

Malayziya hukumati Tailand bilan chegara yaqinida ommaviy qabriston topilgani haqidagi xabarlarni tasdiqladi. Bu haqda “TASS” xabar bermoqda.

Malayziya ichki ishlar vaziri Zohid Hamidiyning so‘zlariga ko‘ra, ommaviy qabriston Bangladesh va Myanmadan kelgan noqonuniy muhojirlar uchun mo‘ljallangan 17ta lager yonida bo‘lgan.

Politsiya ushbu obyektni topgan vaqtda, u yerda hech kim bo‘lmagan. “Ushbu lagerlar bu yerlarda besh yillardan beri faoliyat olib borgan bo‘lishi mumkin”, - dedi vazir.

Malayziya matbuoti xabarlariga ko‘ra, qabrlarda Myanmada istiqomat qiluvchi va Islom diniga e’tiqod qiladigan rohinja xalqi vakillarining jasadlari bo‘lishi mumkin.

Myanmada ko‘pchilikni tashkil etuvchi buddaviylar va musulmon-rohinjalar o‘rtasida 2012-yilda qonli to‘qnashuvlar boshlanganidan so‘ng, rohinjalar ommaviy ravishda Tailand va Malayziyaga qochishni boshlagan.