Малайзияда қочоқларнинг оммавий қабристонлари топилди
Малайзия ҳукумати Таиланд билан чегара яқинида оммавий қабристон топилгани ҳақидаги хабарларни тасдиқлади. Бу ҳақда ТАСС хабар бермоқда.
Малайзия ички ишлар вазири Зоҳид Ҳамидийнинг сўзларига кўра, оммавий қабристон Бангладеш ва Мьянмадан келган ноқонуний муҳожирлар учун мўлжалланган 17та лагерь ёнида бўлган.
Полиция ушбу объектни топган вақтда, у ерда ҳеч ким бўлмаган. «Ушбу лагерлар бу ерларда беш йиллардан бери фаолият олиб борган бўлиши мумкин», - деди вазир.
Малайзия матбуоти хабарларига кўра, қабрларда Мьянмада истиқомат қилувчи ва Ислом динига эътиқод қиладиган роҳинжа халқи вакилларининг жасадлари бўлиши мумкин.
Мьянмада кўпчиликни ташкил этувчи буддавийлар ва мусулмон-роҳинжалар ўртасида 2012 йилда қонли тўқнашувлар бошланганидан сўнг, роҳинжалар оммавий равишда Таиланд ва Малайзияга қочишни бошлаган.
