Surxondaryoda kollej rahbaridan 6 million so‘m talab qilgan o‘qituvchi qo‘lga olindi
Surxondaryodagi kollejda yoshlarni chaqiruvga qadar boshlang‘ich tayyorlash fanidan dars beruvchi shaxs bir kuni kollej direktorining faoliyati yuzasidan jamoadoshi huquqni muhofaza qilish organlariga shikoyat yozganini eshitib qoldi, deb xabar beradi “Huquq” nashri.
Ko‘p o‘tmay, mazkur ariza yuzasidan tegishli organlar tomonidan mutaxassislar jalb etilgan holda tekshiruv boshlandi. Har bir gapdan xabardor bo‘lib yurgan yoshlarni chaqiruvga qadar boshlang‘ich tayyorlash fani o‘qituvchisi direktorning xonasiga kirib, tekshiruvni tanish-bilishlari orqali yanada jiddiy tus oldirishi mumkinligi aytib, rahbarni qo‘rqitishga tushdi. O‘qituvchi, shuningdek, bu jarayonni to‘xtata olishi mumkinligini ham aytib, buning evaziga direktordan 5 million so‘m talab qildi.
Uning gaplariga ishongan kollej direktori yiqqan-tergan 4,5 million so‘m pulini o‘qituvchiga tutqazdi. Pullar o‘qituvchi ehtiyojlari yo‘lida sarflandi.
Oradan 10 kun o‘tib, avval ariza yozgan xodima yana bir bor ariza yoza boshladi. Bundan xabar topgan o‘qituvchi xodimadan arizani olib, direktorning xonasiga kirdi va uni yana qo‘rqitib, bu safar avval qolib ketgan 500 ming so‘m bilan birga jami 1,5 million so‘m berishini so‘radi.
Ammo bu safar kollejga rahbarlik qilayotgan ayolda o‘qituvchiga nisbatan shubha uyg‘ondi. O‘qituvchi maktab yaqinidagi oshxonalardan biriga kelishilgan pulni olish uchun kelganida huquqni muhofaza qilish organlari xodimlari tomonidan qo‘lga olindi va javobgarlikka tortildi.
