“Erudit” matbuot markazida Zokirovlar sulolasi vakillari kitoblarining taqdimoti bo‘lib o‘tdi

Nizomiddin Zokirov – Soidiyning “Kechikkan kitob”i chop etilgan, uning bobosi, o‘tgan asrda Kattaqo‘rg‘onda qozilik qilgan shoir Salohiddin mahdum – Salohiyning kitobi nashrga tayyorlanayotgani haqida ma’lum qilingan edi, deb xabar beradi “Bekajon” gazetasi.

“Kutilgan kitob” ham nashrda chiqib, 9-aprel kuni “Erudit” matbuot markazida mazkur ikki kitobning taqdimoti bo‘lib o‘tdi. Taqdimot marosimida O‘zbekiston xalq yozuvchisi Tohir Malik, O‘zbekiston xalq shoiri Usmon Azim, taniqli shoirlar Zebo Mirzo, Muhammad Ismoil, Farmon Toshev, Orif Hojiyev, yana ko‘plab qalamkashlar, adabiyotshunos olimlar va she’riyat shaydolari ishtirok etdi.

Tantanali kechada Salohiy va Soidiy g‘azallari o‘qildi. O‘zbekiston va Tojikiston xalq artisti Mardon Mavlonov, O‘zbekistonda xizmat ko‘rsatgan madaniyat xodimi Furqat Mirzayev hamda Bahodir Sirojiddinov va Rasul Qalandarov kabi taniqli san’atkorlar “Kutilgan kitob”dagi g‘azallarga bastalangan yangi qo‘shiqlarini ijro etdi.

Zokirovlar sulolasi vakillari kitoblarni nashr etishda hissasi qo‘shilgan Karimberdi To‘ramurod, Hamza Sheraliyev va Dilorom Salohiyga qimmatbaho sovg‘alar taqdim etdi. Tadbir qatnashchilariga esa yangi kitoblar va “Erudit” ijodiy markazi mahsulotlari hadya qilindi.