Fransiyalik “o‘rgimchak odam” ehtiyot vositalarisiz BAAdagi eng baland osmono‘par binolardan biriga chiqdi

“Fransiyalik o‘rgimchak odam” sifatida taniqli bo‘lgan Alen Rober hech qanday ehtiyot vositalarisiz navbatdagi osmono‘par bino — Dubaydagi 75 qavatli Kayan Tower’ga ko‘tarildi, deya xabar bermoqda “TASS”. Rober 310 metr balandlikka 65 daqiqada ko‘tarilgan.

U alpinistlik aslahalaridan faqat bo‘r va maxsus oyoq kiyimidan foydalandi, xolos. Rober jahon rekordi o‘rnatish uchun Ginnesning Rekordlar kitobiga ariza bermoqchi.

O‘z karyerasi davomida “fransiyalik o‘rgimchak odam” 130 ga yaqin osmono‘par binolarga, jumladan BAAdagi Burj Khalifa, Nyu-Yorkdagi Empire State Building, Parijdagi Eyfel minorasiga chiqqan.