19-mart kuni Rossiya sanoatchilar va tadbirkorlar ittifoqi idorasi byurosi bilan yopiq uchrashuvda Vladimir Putin biznesmenlarga Ukraina rahbari Pyotr Poroshenko unga Donbassni Rossiya tarkibiga qo‘shib olishni taklif qilganini, biroq u bundan bosh tortganini gapirib berdi. Bu haqda vaziyatdan xabardor manbalariga tayanib, Forbes xabar bermoqda, deb yozadi “RBK”.
Putin so‘zlariga ko‘ra, Poroshenko ushbu mavzuda 11—12-fevral kunlari Minskda bo‘lib o‘tgan “Normand to‘rtligi” muzokaralarida gap ochgan.
“U [Poroshenko] menga to‘g‘ridan-to‘g‘ri: ‘Donbassni olavering’, — dedi. Men unga: ‘Aqldan ozganmisiz? Menga Donbass kerak emas. Agar sizga kerak bo‘lmasa, uni mustaqil deb e’lon qiling’, — deb javob berdim”, — deya Putin gapidan iqtibos keltirdi Forbes hamsuhbatiga tayanib.
Poroshenko esa Ukraina hukumati Donbass mustaqilligini e’lon qila olmasligini aytgan. Putin bunga javoban go‘yoki Ukraina hukumati Donbass aholisiga pensiya, nafaqalarni to‘lashini va bank tizimini qayta tiklashini talab qilgan.
Izoh (0)