Sirdaryo viloyati Guliston tumanidan bo‘lgan ayol turmush o‘rtog‘ining vafotidan so‘ng, ishxonasiga yaqin bo‘lishi uchun o‘z uyining kalitlarini qo‘shni ayolga qoldirib, ikki qizi bilan Guliston shahridagi hovliga ko‘chib keldi, deb xabar bermoqda “Postda” nashri.
Qo‘shni ayol uy bekasi kelguniga qadar hovlidan xabardor bo‘lib turdi. Iyul oyining boshlarida uy bekasi xordiq chiqarish maqsadida hovlisiga keldi. Shunda qo‘shni ayol bekadan avval kelganida o‘zi bilan konditsionerini olib ketayotgani haqida ogohlantirib qo‘ymaganini aytdi. Beka bundan xushyor tortdi va uyga kirdi. Shunda uydagi nafaqat konditsioner, balki boshqa narsalar ham yo‘qolganini payqashdi.
Xonadonga yetib kelgan ichki ishlar idoralari tergov-surishtiruv harakatlarini boshlab yubordi. Bu jarayonda qo‘shni ayol yaqinda o‘zining iltimosi tufayli o‘g‘li do‘sti bilan kelib tomorqadagi bedani o‘rib ketganini esladi. Shu tariqa, mazkur jinoyat qo‘shni yigitning ustachilik bilan shug‘ullanadigan do‘sti va uning boshqa bir tanishi tomonidan sodir etilgani ma’lum bo‘ldi.
Guliston shahrida istiqomat qiluvchi mazkur 2 yigitga sud tomonidan tegishli jazo tayinlandi. Jabrlanuvchiga yetkazilgan jazo qoplandi.
Izoh (0)