AQShda Ebolaga qarshi vaksina muvaffaqiyatli sinovdan o‘tkazildi

Ebola virusiga qarshi tajriba vaksinasi AQShda ilk klinik sinovlardan muvaffaqiyatli o‘tdi. Bu haqda Allergiya va infeksiya kasalliklari milliy instituti rahbari Entoni Fauchi ma’lum qildi, deb xabar bermoqda “TASS”.

Olimlarning so‘zlariga ko‘ra, vaksina 20 nafar ko‘ngillida sinab ko‘rilgan va ularning har birida ijobiy natija ko‘zga tashlangan. Jumladan, ularning immun tizimi preparat ta’sirida Ebolaga qarshilik ko‘rsatadigan antitelolar ishlab chiqara boshlagan.

Ikki kishidagi qisqa muddatli harorat oshishidan tashqari zararli ta’sirlar kuzatilmagan. Ushbu vaksina Ebolaga qarshi kurash yo‘lidagi muham qadam sifatida baholanmoqda. Oq uy ushbu kashfiyot uchun olimlarni tabriklagan. AQSh prezidenti Barak Obama 2-dekabr kuni vaksina yaratilgan institutga tashrif buyurmoqchi.