Olti kishi barchadan ajratilib, Gavayi vulqoni yonbag‘rida — Mars sayyorasidagi sharoitlarga eng yaqin holatlarda joylashtirildi. Bu bilan ularning ruhiy holatiga yaqinda amalga oshirilishi kutilayotgan qizil sayyoraga sayohat qanday ta’sir o‘tkazishi o‘rganib chiqiladi. Bu haqda The Washington Post’ga tayanib “RIA Novosti” xabar bermoqda.
“Biz uzoq muddatli fazoviy sayohatning asrtonavtlarga ko‘rsatadigan ta’sirini oldindan ko‘ra olish uchun inson ongining qanday ishlashi, alohida shaxslarning guruhga ta’siri va guruhning vaqt o‘tishi bilan qay tarzda o‘zgarishini bilib olishimiz zarur”, — dedi loyihaning bosh tadqiqotchisi, Manoadagi Gavayi universiteti professori Kim Binsted.
Loyihaga belgilangan maqsadni amalga oshirish uchun olti kishi — uch nafar erkak va uch nafar ayol kishi jalb etildi. Ular yaqin sakkiz oyni tashqi dunyodan butunlay ajralgan holda Gavayi orolidagi Mauna-Loa vulqoni yonbag‘rida maxsus gumbaz ostida o‘tkazadi.
Mazkur tajriba Manoadagi Gavayi universiteti rejalashtirgan uch loyihadan ikkinchisidir. Ushbu loyihalar kelajakda amalga oshiriladigan to‘rt, sakkiz va 12 oylik kosmik missiyalar uchun tadqiqot olib borishni ko‘zda tutadi.
Ma’lumot o‘rnida, NASA odamni Marsga uchirish missiyasini 2030-yilgacha amalga oshirishni rejalashtirmoqda.
Izoh (0)