Олти киши барчадан ажратилиб, Гавайи вулқони ёнбағрида — Марс сайёрасидаги шароитларга энг яқин ҳолатларда жойлаштирилди. Бу билан уларнинг руҳий ҳолатига яқинда амалга оширилиши кутилаётган қизил сайёрага саёҳат қандай таъсир ўтказиши ўрганиб чиқилади. Бу ҳақда The Washington Post’га таяниб «РИА Новости» хабар бермоқда.

«Биз узоқ муддатли фазовий саёҳатнинг асртонавтларга кўрсатадиган таъсирини олдиндан кўра олиш учун инсон онгининг қандай ишлаши, алоҳида шахсларнинг гуруҳга таъсири ва гуруҳнинг вақт ўтиши билан қай тарзда ўзгаришини билиб олишимиз зарур», — деди лойиҳанинг бош тадқиқотчиси, Маноадаги Гавайи университети профессори Ким Бинстед.

Лойиҳага белгиланган мақсадни амалга ошириш учун олти киши — уч нафар эркак ва уч нафар аёл киши жалб этилди. Улар яқин саккиз ойни ташқи дунёдан бутунлай ажралган ҳолда Гавайи оролидаги Мауна-Лоа вулқони ёнбағрида махсус гумбаз остида ўтказади.

Мазкур тажриба Маноадаги Гавайи университети режалаштирган уч лойиҳадан иккинчисидир. Ушбу лойиҳалар келажакда амалга ошириладиган тўрт, саккиз ва 12 ойлик космик миссиялар учун тадқиқот олиб боришни кўзда тутади.

Маълумот ўрнида, NASA одамни Марсга учириш миссиясини 2030 йилгача амалга оширишни режалаштирмоқда.