Qirg‘iziston arxitektura, qurilish va uy-joy kommunal xo‘jalik agentligi direktori o‘rinbosari Daniyar Sheyshekanov ishga velosipedda qatnashni boshladi. Bu haqda Knews.kg xabar bermoqda.
“Kun”ning yozishicha, amaldorning Hukumat uyidan velosipedda chiqib ketayotgani tasvirlangan fotosurat dastlab Facebook ijtimoiy tarmog‘i foydalanuvchilari tomonidan e’lon qilingan, shundan so‘ng bu holat qizg‘in muhokama mavzusiga aylangan.
“Velosipedda harakatlanish qulay va nisbatan tez, bunda shahardagi tirbandliklarda qolib ketmaysan, shuning uchun men aynan velosipeddan foydalanaman. Yagona muammo — qishda bunday bo‘lmaydi”, – dedi amaldor Knews.kg’ga bergan intervyusida.
Sheyshekanovning so‘zlariga ko‘ra, hamkasblari ham velosipedda harakatlanish qulay ekanligini ko‘rib, direktor o‘rinbosaridan namuna olishni rejalashtirishmoqda.
Qirg‘izistonlik aksariyat amaldorlar qimmatbaho mashinalarda yurishni ma’qul ko‘rishlariga qanday munosabatda ekanligiga qiziqilganda, Sheyshekanov bunday imtiyozlarga qarshi ekanligini ma’lum qilgan.
Internet-nashrning qayd etishicha, 31 yoshli amaldor 19-iyun kuni bosh vazir farmoyishi bilan agentlik direktori o‘rinbosari etib tayinlangan.
Izoh (0)