Kavkaz va Markaziy Osiyo mintaqasidagi mamlakatlar qashshoqlikka qarshi kurashish, ta’lim sohasi va gender tengligini ta’minlashda sezilarli muvaffaqiyatlarga erishdi. Bu haqda 7-iyul kuni Nyu-Yorkda BMT Bosh kotibi Pan Gu Mun tomonidan taqdim etilgan Mingyillikning taraqqiyot maqsadlari haqidagi ma’ruzada aytiladi, deb yozadi Gazeta.uz.
Shu bilan birga, ma’ruzada ta’kidlanishicha, mintaqa 2015-yilgacha qator muammolarni, jumladan atrof-muhitni himoya qilish sohasidagi masalalarni qo‘shimcha harakatlarsiz hal eta olmaydi. Ayni paytda Kavkaz va Markaziy Osiyodagi yangilanadigan suv manbalari qisqarmoqda, bu mintaqada suv tanqisligi xavfini keltirib chiqaradi.
“Mingyillikning taraqqiyot maqsadlari” ma’ruzasida Ozarboyjon, Armaniston, Gruziya, Qozog‘iston, Qirg‘iziston, Tojikiston, Turkmaniston va O‘zbekistonda erishilgan ijobiy natijalardan misollar keltirildi.
2015-yilgacha mintaqada ochin-to‘qin yashaydigan aholi sonini ikki baravar qisqartirishga erishib bo‘lindi. Bunday kishilarning ulushi 1990-yildagi 14 foizdan 2013-yilda 7 foizgacha kamaydi. O‘ta qashshoqlikda yoki kuniga 1,25 dollardan kam pul evaziga yashovchi aholi hissasi esa 1990-yildagi 10 foizdan 2010-yilda 4 foizgacha qisqardi.
2000-yilda BMTning Mingyillik sammitida barcha davlatlar bilan kelishilgan sakkizta Mingyillikning taraqqiyot maqsadlari nochorlik, ochlik, sog‘lik, gender tengligi, ta’lim va atrof-muhit sohasidagi ko‘rsatkichlarga bog‘liq qator vazifalarni nazarda tutadi. Ularning ko‘pchiligi 2015-yil oxirigacha hal etilishi lozim.
Izoh (0)