Ermatov 9 ta match bilan jahon chempionatlarida eng ko‘p o‘yinni boshqargan referiga aylanadi

FIFA referisi Ravshan Ermatov futbol bo‘yicha jahon chempionatida boshqarilgan matchlar soni bo‘yicha rekord o‘rnatadi.

JCh — 2014 chorak finalidagi Gollandiya — Kosta-Rika terma jamoalari o‘rtasidagi o‘yin Ravshan Ermatovning jahon chempionatlaridagi jami 9-o‘yini bo‘ladi. Hozirgacha hech qaysi referi jahon chempionatlarida 9 ta o‘yinga hakamlik qilmagan.

Gollandiya — Kosta-Rika o‘yini Braziliyadagi mundialda Ermatov boshqaradigan 4-uchrashuv bo‘ladi. Bungacha hamyurtimiz Shveysariya – Ekvador (2:1), Xorvatiya – Meksika (1:3), AQSh – Germaniya (0:1) uchrashuvlarida ishlagan edi.

26-iyun kuni Ravshan Ermatov Germaniya va AQSh jamoalari o‘rtasidagi bahsga hakamlik qilib, u kabi sakkizta uchrashuvni boshqargan Joel Kinyu (Fransiya), Xorxe Larrionda (Urugvay) va Benito Archundia (Meksika)lar rekordini takrorlagan edi.

Eslatib o‘tamiz, Ravshan Ermatov 2010-yil JARda bo‘lib o‘tgan futbol bo‘yicha jahon chempionatida beshta uchrashuvga hakamlik qilgan.