O‘tgan hafta mobaynida respublika hududida 244 ta yong‘in qayd etildi. Turli sabablarga ko‘ra sodir bo‘lgan yong‘inlarda uch nafar fuqaro tan jarohati olgan va uch nafar fuqaro halok bo‘lgan. Bu haqda O‘zbekiston Respublikasi Ichki ishlar vazirligi matbuot xizmati xabar berdi.
Qashqadaryo viloyati Qamashi tumanidagi qurilishi tugallanmagan E. Pardayevning uyida yong‘in sodir bo‘lib, 32 kvadrat metr maydonda uy jihozlari yongan. Yong‘in oqibatida uy egasi va uning o‘g‘li B. Jo‘rayev tutundan dimiqib bevaqt olamdan ko‘z yumgan. Ikkinchi o‘g‘li D. Jo‘rayev kuyish tan jarohati olib, tuman markaziy shifoxonasiga yotqizilgan. Yong‘in elektr isitish pechidan foydalanishda yong‘in xavfsizligi qoidalari buzilishidan sodir bo‘lgan.
Toshkent viloyati Bo‘stonliq tumanida yashovchi fuqaro A. Tolipovning uyida yong‘in sodir bo‘lib, 80 kvadrat metr maydonda tom va shift qismi yonib zararlangan. Uyning tomida qishga g‘amlangan somon isitish pechining mo‘risiga yaqin saqlanishi va mo‘rkonning qizishi sababli yong‘in sodir bo‘lgan. Yong‘in oqibatida hech kim zarar ko‘rmagan.
Elektr simlarining qisqa tutashuvi natijasida ham yong‘inlar yuz bermoqda. Xorazm viloyatining Urganch tumanida yashovchi fuqaro X. Jumayev xonadonida bir vaqtning o‘zida bir nechta elektr jihozining elektr manbaiga ulanishi oqibatida tomdagi elektr simlarining qisqa tutashuvi ro‘y berib, yong‘in chiqishiga sabab bo‘lgan. Yong‘in oqibatida 220 kvadrat metr maydonda uy tomi, shifti va jihozlar zararlangan.
Toshkent viloyati Angren shahridagi uylarning biridan chiqayotgan tutun qo‘shnilarning 01 xizmatiga yong‘in haqida xabar berishiga sabab bo‘lgan. O‘z vaqtida belgilangan manzilga yetib kelgan yong‘in o‘chiruvchilari, tutun chiqayotgan xonadonga kirib yong‘inni bartaraf etgan. Yong‘in oqibatida 90 kvadrat metr maydonda uy tomi, shifti va uy jihozlari zararlangan. Surishtiruv ishlari olib borilganda, xonaga o‘rnatilgan isitish pechi ko‘mir bilan yoqilganidan so‘ng qarovsiz qoldirilganligi va pechdan ko‘mir bo‘lagi polga tushib, yong‘in ro‘y bergani ma’lum bo‘ldi.
Mamlakat bo‘yicha sodir bo‘lgan barcha yong‘inlardan 944 million so‘mdan ortiq qurilish materiallari va 966 million so‘mdan ziyod moddiy boyliklar yong‘indan saqlab qolingan.
Izoh (0)