Қашқадарёдаги ёнғин туфайли уй эгаси ва ўғли вафот этди

Ўтган ҳафта мобайнида республика ҳудудида 244 та ёнғин қайд этилди. Турли сабабларга кўра содир бўлган ёнғинларда уч нафар фуқаро тан жароҳати олган ва уч нафар фуқаро ҳалок бўлган. Бу ҳақда Ўзбекистон Республикаси Ички ишлар вазирлиги матбуот хизмати хабар берди.

Қашқадарё вилояти Қамаши туманидаги қурилиши тугалланмаган Э. Пардаевнинг уйида ёнғин содир бўлиб, 32 квадрат метр майдонда уй жиҳозлари ёнган. Ёнғин оқибатида уй эгаси ва унинг ўғли Б. Жўраев тутундан димиқиб бевақт оламдан кўз юмган. Иккинчи ўғли Д. Жўраев куйиш тан жароҳати олиб, туман марказий шифохонасига ётқизилган. Ёнғин электр иситиш печидан фойдаланишда ёнғин хавфсизлиги қоидалари бузилишидан содир бўлган.

Тошкент вилояти Бўстонлиқ туманида яшовчи фуқаро А. Толиповнинг уйида ёнғин содир бўлиб, 80 квадрат метр майдонда том ва шифт қисми ёниб зарарланган. Уйнинг томида қишга ғамланган сомон иситиш печининг мўрисига яқин сақланиши ва мўрконнинг қизиши сабабли ёнғин содир бўлган. Ёнғин оқибатида ҳеч ким зарар кўрмаган.

Электр симларининг қисқа туташуви натижасида ҳам ёнғинлар юз бермоқда. Хоразм вилоятининг Урганч туманида яшовчи фуқаро Х. Жумаев хонадонида бир вақтнинг ўзида бир нечта электр жиҳозининг электр манбаига уланиши оқибатида томдаги электр симларининг қисқа туташуви рўй бериб, ёнғин чиқишига сабаб бўлган. Ёнғин оқибатида 220 квадрат метр майдонда уй томи, шифти ва жиҳозлар зарарланган.

Тошкент вилояти Ангрен шаҳридаги уйларнинг биридан чиқаётган тутун қўшниларнинг 01 хизматига ёнғин ҳақида хабар беришига сабаб бўлган. Ўз вақтида белгиланган манзилга етиб келган ёнғин ўчирувчилари, тутун чиқаётган хонадонга кириб ёнғинни бартараф этган. Ёнғин оқибатида 90 квадрат метр майдонда уй томи, шифти ва уй жиҳозлари зарарланган. Суриштирув ишлари олиб борилганда, хонага ўрнатилган иситиш печи кўмир билан ёқилганидан сўнг қаровсиз қолдирилганлиги ва печдан кўмир бўлаги полга тушиб, ёнғин рўй бергани маълум бўлди.

Мамлакат бўйича содир бўлган барча ёнғинлардан 944 миллион сўмдан ортиқ қурилиш материаллари ва 966 миллион сўмдан зиёд моддий бойликлар ёнғиндан сақлаб қолинган.