O‘zbekiston Prezidenti Islom Karimov 15-aprel kuni “Tadbirkorlik faoliyatini amalga oshirish va davlat xizmatlarini ko‘rsatish bilan bog‘liq tartibotlarni yanada takomillashtirish chora-tadbirlari to‘g‘risida”gi Qarorni imzoladi. Qaror matni O‘zA tomonidan e’lon qilindi.
Qaror Prezidentning 2014-yil 7-apreldagi “O‘zbekiston Respublikasida investitsiya iqlimi va ishbilarmonlik muhitini yanada takomillashtirishga doir qo‘shimcha chora-tadbirlar to‘g‘risida”gi Farmoniga muvofiq hamda litsenziyalashni va ruxsat etish xarakteriga ega hujjatlarni berish mexanizmlarini yanada soddalashtirish va arzonlashtirish, shuningdek, tadbirkorlikka ko‘proq erkinlik berish maqsadida qabul qilindi.
Unga ko‘ra, O‘zbekiston Iqtisodiyot vazirligi, Adliya vazirligi, Moliya vazirligi, Xususiylashtirish, monopoliyadan chiqarish va raqobatni rivojlantirish davlat qo‘mitasi, Aloqa, axborotlashtirish va telekommunikatsiya texnologiyalari davlat qo‘mitasi, Savdo-sanoat palatasi, boshqa manfaatdor vazirlik va idoralarning takliflariga asosan 2014-yil 1-iyundan boshlab, tadbirkorlik faoliyati sohasidagi litsenziyalanadigan faoliyatning va ruxsat etish xarakteriga ega hujjatlarning alohida turlari bekor qilinishi, faoliyatning litsenziyalanadigan turlarini va ruxsat etish xarakteriga ega tartibotlarni rasmiylashtirishning muddatlari va yig‘imlari miqdorlari qisqartirilishi, shuningdek, ruxsat etish xarakteriga ega hujjatlarni va litsenziyalarni olish tartibotlarini yanada qisqartirish va soddalashtirish to‘g‘risidagi takliflar qabul qilinishi lozim.
Shuningdek, Vazirlar Mahkamasi litsenziya va ruxsat etish xarakteriga ega hujjatlarni berish bo‘yicha vakolatli organlar, Iqtisodiyot vazirligi, Adliya vazirligi, Aloqa, axborotlashtirish va telekommunikatsiya texnologiyalari davlat qo‘mitasi bilan birgalikda 2015-yil 1-yanvargacha bo‘lgan muddatda faoliyatning ayrim turlarini litsenziyalashda “bir darcha” tamoyilini qonun hujjatlari darajasida joriy etish ta’minlanishi, tadbirkorlik subyektlari tomonidan litsenziya kelishuvlari shartlarini bajarish bo‘yicha davriy hisobotlarni elektron shaklda taqdim etib borish uchun dasturiy mahsulotlarni ishlab chiqish va joriy etish 2014-yilning oxirigacha tamomlanishi zarur.
Qarorda Aloqa, axborotlashtirish va telekommunikatsiya texnologiyalari davlat qo‘mitasi faoliyatning litsenziyalanadigan turlarini va ruxsat etish tartibotlarini rasmiylashtirishni elektron shaklga o‘tkazish, shuningdek, davlat organlarining tadbirkorlik subyektlari bilan o‘zaro elektron hamkorligini joriy etish samaradorligini baholash bo‘yicha chora-tadbirlarni amalga oshirish yuzasidan ishlarni muvofiqlashtirish va tizimli monitoring qilishi, Markaziy bank, “O‘zkommunxizmat” agentligi, manfaatdor vazirlik va idoralar bilan birgalikda 2014-yilning oxirigacha Kommunal xo‘jalik va uy-joy fondi portalini elektron to‘lov tizimlari va kommunal xizmatlarning billing tizimlari bilan birlashtirish yo‘li orqali mazkur portalni takomillashtirish bo‘yicha aniq chora-tadbirlarni amalga oshirish, bunda tadbirkorlik subyektlariga axborot-kommunikatsiya texnologiyalaridan foydalangan holda, real vaqt rejimida o‘zaro hisob-kitoblar holati to‘g‘risida xabar berish bo‘yicha xizmatlar ko‘rsatish imkoniyatlari nazarda tutish, shuningdek, manfaatdor vazirliklar, idoralar, xo‘jalik birlashmalari va tadbirkorlik subyektlariga 2013—2020-yillar davrida O‘zbekistonning Milliy axborot-kommunikatsiya tizimini rivojlantirishning kompleks dasturi doirasida ishlab chiqilayotgan axborot tizimlaridan bepul foydalanish imkoniyati yaratish kerakligi belgilangan.
O‘zbekiston Respublikasi Vazirlar Mahkamasi Aloqa, axborotlashtirish va telekommunikatsiya texnologiyalari davlat qo‘mitasi, boshqa manfaatdor vazirliklar, davlat qo‘mitalari, idoralar va tashkilotlar bilan birgalikda 2014-yil 1-oktabrdan boshlab, O‘zbekiston Respublikasining Interaktiv davlat xizmatlari yagona portalida moliya, soliq, statistika va boshqa turdagi hisobotlarni interaktiv rasmiylashtirish va taqdim etish; soliq va boshqa majburiy to‘lovlarni, kommunal to‘lovlarni, litsenziya va ruxsat etish xarakteriga ega hujjatlar bo‘yicha ko‘rib chiqishda va ularni olishda to‘lanadigan yig‘imlarni va davlat bojlarini Internet-banking tizimi orqali to‘lash hamda ma’lumotnomalar olish va boshqa interaktiv davlat xizmatlaridan foydalanish imkonini beradigan maxsus “tadbirkorlik subyektining kabineti”ni ishga tushirishi lozim.
Bundan tashqari, 2014-yil 1-iyundan boshlab, tadbirkorlik subyektlariga “bir darcha” tamoyili bo‘yicha elektron shaklda tadbirkorlik subyektlarining ularni Mahalliylashtirish dasturiga kiritishga doir talabnomalarini ko‘rib chiqish uchun O‘zbekiston Respublikasi Moliya vazirligiga, Tashqi iqtisodiy aloqalar, investitsiyalar va savdo vazirligiga, Xususiylashtirish, monopoliyadan chiqarish va raqobatni rivojlantirish davlat qo‘mitasiga taqdim etish; milliy valyutada bir yilgacha bo‘lgan muddatga kredit olishga doir hujjatlarni xizmat ko‘rsatuvchi tijorat banklariga topshirish huquqini beradigan tartib o‘rnatilishi belgilangan.
O‘zbekiston Respublikasi Vazirlar Mahkamasining komplekslari rahbarlari O‘zbekiston Respublikasi Bosh prokuraturasi, Adliya vazirligi bilan birgalikda tadbirkorlik subyektlarining moliya-xo‘jalik faoliyatiga noqonuniy aralashish, shuningdek, davlat xizmatlarini ko‘rsatishda ortiqcha qog‘ozbozlikka yo‘l qo‘yish holatlari uchun davlat va xo‘jalik boshqaruvi organlarining mansabdor shaxslariga nisbatan ma’muriy javobgarlik choralarini kuchaytirishni nazarda tutgan holda qonun hujjatlariga o‘zgartish va qo‘shimchalar kiritish bo‘yicha takliflarni ikki oy muddatda belgilangan tartibda kiritishi zarur.
O‘zbekiston Respublikasi Iqtisodiyot vazirligi, Moliya vazirligi, Aloqa, axborotlashtirish va telekommunikatsiya texnologiyalari davlat qo‘mitasi, boshqa manfaatdor vazirlik va idoralar bilan birgalikda mamlakatda qulay ishbilarmonlik muhitini yaratish bo‘yicha qabul qilinayotgan me’yoriy-huquqiy hujjatlarni keng yoritish yuzasidan har bir hududda tadbirlar o‘tkazilishi tayinlangan.
Iqtisodiyot vazirligi Adliya vazirligi va boshqa manfaatdor vazirliklar, idoralar, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda ruxsat etish xarakteriga ega hujjatlar va litsenziyalarni berish tartibotlarini belgilaydigan me’yoriy-huquqiy hujjatlarga 2014-yil 1-iyungacha tegishli o‘zgartishlar kiritilishi lozim.
Qaror ijrosini nazorat qilish O‘zbekiston Respublikasining Bosh vaziri Sh. M. Mirziyoyev zimmasiga yuklatilgan.
Izoh (0)