Avstraliyadagi muzeydan Napoleonning shaxsiy buyumlari to‘plami o‘g‘irlandi

Avstraliyaning Viktoriya shtatidagi Brayers qo‘rg‘on-muzeyidan Napoleon Bonapartning shaxsiy buyumlari kolleksiyasi o‘g‘irlandi. Bu haqda “ITAR-TASS” xabar berdi.

O‘g‘irlangan eksponatlar ichida kumush siyohdon, tamakidon, ichida Napoleonning soch tolasi bo‘lgan medalyon, shuningdek, uning esdalik yozuvi tushirilgan tasma bor.

Qo‘riqlash signalizatsiyasi ishlab ketganidan 10 daqiqa o‘tib, muzeyga politsiya yetib kelgan, biroq ungacha o‘g‘rilar qochib ulgurgan. Detektiv Maykl Lemning taxminicha, jinoyatga yaxshigina tayyorgarlik ko‘rilgan. U o‘g‘irlikning biron-bir ashaddiy kolleksioner tomonidan uyushtirilgani haqidagi gumonni ham ilgari surmoqda.

Brayers qo‘rg‘oni Muqaddas Yelena orolida tug‘ilgan Aleksandr Bitson Balkomb tomonidan XIX asrda qurilgan. Napoleon orolga surgun qilingach, Balkomblar oilasi bilan yaqindan tanishgan. Uning shaxsiy buyumlarini Balkombning nevarasi yig‘gan.