Bugun KXDRda milliy bayram — Kim Ir Sen tavalludining 102 yilligini nishonlashdi. Shu munosabat bilan Kim Chen In otasi va bobosining qabri joylashgan Kimsusan saroyini ziyorat qildi. Bu haqda “ITAR-TASS” xabar berdi.
O‘tgan yili parlament deputatlari barcha koreyslarga “ushbu buyuk inshootni muqaddas ibodatxona va butun millatning g‘ururi deb bilish” majburiyatini yuklovchi qarorni tasdiqlagan edi.
Koreya xalq armiyasi (KXA) Bosh siyosiy boshqarmasi rahbari Chxe Ryon Xe, KXA bosh qarorgohi rahbari Li Yon Gil, milliy qurolli kuchlar vaziri Chan Chon Nam va boshqalar ham Kim Chen In ziyoratida hamrohlik qilishdi.
Shuningdek, mamlakatda bayramga bag‘ishlab “Aprel bahori” xalqaro festivali o‘tkazildi. Dunyoning turli burchaklarida yashovchi koreyslar ham shu kuni vatanlarini ziyorat qilib ketishdi.
Mamlakat poytaxtida “‘Kim-ir-senchasiga’ yashaymiz va kurashamiz” shiori ostida namoyishlar va yig‘ilishlar o‘tkazildi.
Kim Ir Sen KXDR vazirlar mahkamasi raisi lavozimini 1948—1972-yillarda egallagan, undan keyin prezidentlikka saylangan. 1994-yilda vafot etgach, Kim Ir Sen KXDRning abadiy prezidenti deya e’lon qilingan.
Izoh (0)