AQSh Markaziy razvedka boshqarmasi (MRB) direktori Jon Brennan dam olish kunlarini Kiyevda o‘tkazdi. Oq uy matbuot kotibi Jey Karnining aytishicha, Brennan Kiyevga Yevropaga sayohati doirasida tashrif buyurgan. Bu haqda Vesti.ru xabar berdi.
Karnining qo‘shimcha qilishicha, AQSh Rossiyaning Kiyevga nisbatan harakatlarini “baholashda davom etmoqda”. “Vashington bu borada o‘z ittifoqdoshlari bilan muntazam maslahatlashib turadi”, — dedi u. Shuningdek, u Rossiyaga nisbatan hozircha “qo‘shimcha sanksiyalar yo‘q”ligini ma’lum qildi.
MRB vakili Tod Ebitsning ta’kidlashicha, AQSh hukumatining boshqa vakillari kabi Brennan ham Moskva va Kiyev o‘rtasidagi kelishmovchilikni hal qilishning yagona yo‘li diplomatik usullar ekaniga ishonchi komil.
Oliy rada tomonidan tayinlangan Ukraina prezidenti vazifasini bajaruvchi Aleksandr Turchinov 2014-yil 14-aprel kuni o‘z mamlakati fuqarolariga — federalizatsiya tarafdorlariga nisbatan kuch ishlatish haqida buyruq berdi. Kiyevning yangi hukumati chetdan harbiy ko‘makka umid qilmoqda.
Bu orada Oliy rada tomonidan Ukraina Xavfsizlik xizmati rahbari etib tayinlangan Valentin Nalivaychenko MRB tomonidan yollangani ma’lum bo‘ldi. Bu haqda UXX sobiq rahbari Aleksandr Yakimenko bayonot berdi.
Ma’lum bo‘lishicha, Nalivaychenko Vashingtondagi Ukraina elchixonasida bosh konsul bo‘lib ishlayotganidayoq MRB tomonidan jalb etilgan. Elchilikdan ketganidan keyin ham ular bilan aloqada bo‘lib turgan.
Ayni paytda Kiyevdagi UXX binosining bir qavati Amerika maxsus xizmatiga berilgan.
Izoh (0)