2014-yilning o‘tgan davri mobaynida O‘zbekiston Respublikasi bojxonachilari tomonidan huquqni muhofaza qiluvchi boshqa idoralar vakillari bilan hamkorlikda aniqlangan 171 ta qonunbuzarlik holatida 758 million so‘mdan ortiq ekvivalentdagi naqd xorijiy valyutalarning noqonuniy olib o‘tilishiga chek qo‘yildi. Bu haqda Davlat bojxona qo‘mitasi matbuot xizmati xabar berdi.
“Do‘stlik” chegara-bojxona kompleksida esa qo‘shni davlatga 10 ming AQSh dollarini charm kurtkasiga yashirgancha olib chiqishga uringan M. Mamajonov andijonlik bojxonachilar tomonidan qo‘lga olingan.
Bangkokka uchib ketmoqchi bo‘lgan chet el fuqarosi N. Kozlova Toshkent xalqaro aeroportida 5200 AQSh dollarini kiyimlariga yashirib olib chiqishga uringan paytda to‘xtatilgan.
Shuningdek, “Toshkent-Aero” ixtisoslashtirilgan bojxona kompleksi xodimlari tomonidan Toshkent—Novosibirsk aviareysi yo‘lovchilaridan biri, rossiyalik N. Gilmutning ham qing‘ir qilmishlariga nuqta qo‘ydi. Bojxona bayonnomasida 1800 AQSh dollarini olib chiqib ketayotganligini qayd qilgan bu ayol qo‘l sumkasiga yashirilgan 6710 AQSh dollari haqida bayonnomada ham, bojxona xodimining og‘zaki so‘rovi paytida ham ma’lum qilishni “unutib” qo‘ygan.
Hozirda yuqoridagi holatlar yuzasidan bojxona tekshiruvlari va surishtiruv harakatlari davom etmoqda.
Eslatib o‘tamiz, O‘zbekiston Respublikasida rezidentlarga 2000 AQSh dollari ekvivalentidagi, norezidentlarga esa bojxonaga taqdim etilgan deklaratsiyaga muvofiq respublikaga keltirilgan valyuta miqdoridagi naqd xorijiy valyutani bojxona bayonnomasida yozma qayd etish sharti bilan erkin olib chiqib ketishga ruxsat beriladi.
Ko‘rsatilgan miqdordan ortiqcha naqd xorijiy valyutani olib ketishga O‘zbekiston Respublikasi Markaziy banki yoki xorijiy valyuta bilan operatsiyalarni o‘tkazishga asosiy litsenziyasi bo‘lgan vakolatli banklarning ruxsati bilan yo‘l qo‘yiladi.
Izoh (0)