Toshkentdagi maktabda 8-sinf o‘quvchisi tok urib vafot etishi ortidan ushbu maktab direktori o‘rinbosari qamoqqa olingan edi. “Millar” informatsion dasturida ma’lum qilinishicha, jinoyat ishlari bo‘yicha Mirzo Ulug‘bek tuman sudida ayblanuvchilarga hukm o‘qilgan.
2023-yil 27-noyabr kuni Mirzo Ulug‘bek tumanidagi 99-sonli umumtaʼlim maktabi 8-sinf o‘quvchisi A.A. maktab hovlisidagi sport maydonidan chiqib ketayotganida tobi qochgan va hushidan ketgan. STEning dastlabki xulosasiga ko‘ra, bolaning o‘limi elektr jarohati, elektr toki yoyidan zaharlanish, o‘tkir nafas yurak-qon tomir yetishmovchiligi, bosh miya va o‘pka shishi, chap qo‘l kaft sohasi elektr tamg‘asi natijasida yuz bergan.
Dekabr oyida o‘quvchining vafot etishi ortidan maktab direktori va direktor o‘rinbosariga nisbatan jinoyat ishi qo‘zg‘atilgan. Jinoyat ishlari bo‘yicha Toshkent shahar Mirzo Ulug‘bek tuman sudida mazkur ish ko‘rib chiqildi.
Sud hukmiga ko‘ra, maktab direktori va direktor o‘rinbosari Jinoyat kodeksining 207-moddasi (mansabga sovuqqonlik bilan qarash) 3-qismi “a” bandida nazarda tutilgan jinoyatni sodir etganlikda aybli deb topilgan. Ularga 2 yil muddatga mansabdorlik va moddiy javobgarlik yuklatilgan lavozimlarda ishlash huquqidan va 4 yilga ozodlikdan mahrum qilish jazosi tayinlangan.
Izoh (0)