Toshkentdagi masjidlarda o‘g‘rilik qilgan shaxs ushlanib, jazo tayinlandi

Toshkentdagi masjidlarda o‘g‘rilik qilgan shaxs 6 yilga ozodlikdan mahrum etildi. Bu haqda O‘zA xabar qildi.

Ma’lum qilinishicha, fuqaro I.O Toshkentdagi “Abu Saxiy” savdo markazida joylashgan jome masjidi tahoratxonasidagi kiyim qo‘yish joyida turgan kurtkalardan birining cho‘ntagidan 60 ming so‘m va Samsung A24 rusumli telefon apparatini o‘g‘irlab, voqea joyini tark etgan.

Boshqa kuni esa Shayx Muhammad Sodiq Muhammad Yusuf jome masjidi tahoratxonasiga kirib, Samsung A23 telefon apparatini qo‘lga kiritgan. Pulni o‘z ehtiyojiga ishlatib yuborgan, telefon apparatlarini esa har birini 500 ming so‘mdan sotib yuborgan. 

Uning qilmishi Toshkent shahar JIB Chilonzor tuman sudi tomonidan ko‘rib chiqildi va sud hukmiga ko‘ra, I.O. ga 6 yil muddatga ozodlikdan mahrum qilish jazosi tayinlandi.

Shuningdek, u yetkazilgan moddiy zarar uchun jabrlangan ikki shaxs foydasiga 2 million 783 ming so‘m va 1,5 million so‘m to‘laydigan bo‘ldi.