Dushanbe shahridagi “Ko‘hi Borbad” sanʼat saroyida O‘zbekiston va Tojikiston sanʼat ustalari ishtirokida “Do‘stlik oqshomi” bo‘lib o‘tdi. Bu haqda O‘zbekiston prezidenti matbuot xizmati xabar berdi.
Maʼlum qilinishicha, Shavkat Mirziyoyev va Emomali Rahmon konsertni birgalikda tomosha qildi.
Ikki mamlakat sanʼat ustalarining bunday konsertlari xalqlarimiz o‘rtasidagi abadiy va samimiy do‘stlikni ifodalovchi yaxshi anʼanaga aylangan. Zero mehr-oqibatli bo‘lish, tinch-totuv yashash – xalqlarimizning azaliy orzusi va samimiy intilishidir. Bugun ushbu orzu-intilishlar hayotga ko‘chmoqda, mamlakatlarimiz yetakchilarining irodasi va saʼy-harakatlari tufayli xalqlarimiz yanada yaqinlashdi, davlatlararo munosabatlar ittifoqchilik darajasiga ko‘tarildi.
Bu jihatlar bugungi konsert dasturida yana bir bor tasdiqlandi. Isteʼdodli sanʼatkorlar ijro etgan kuy-qo‘shiqlarda xalqlarimiz madaniyatining boyligi, o‘ziga xosligi va shu bilan birga mushtarakligi o‘z ifodasini topdi.
Prezident Shavkat Mirziyoyevning Tojikistonga davlat tashrifi davom etmoqda.
Izoh (0)