Farg‘ona viloyatida MIB aralashuvi bilan kelin sepi erining uyidan olib berildi. Bu haqda byuro axborot xizmati “Daryo”ga xabar berdi.
Keltirilishicha, Farg‘ona viloyatida joriy yil may oyida qurilgan nikoh ikki oy ham o‘tmay kelishmovchilik sababli buzilgan va kelin-kuyov alohida yashay boshlagan. Kelin kuyovdan sepini qaytarishni talab qilib, sudga murojaat qilgan.
Qonunchilikda vindikatsion da’vo degan tushuncha bor (Fuqarolik kodeksi 228-modda). Unga ko‘ra, mulkdor o‘z mol-mulkini boshqa shaxsning qonunsiz egaligidan talab qilib olishga haqli deyilgan. Vindikatsion da’vo qoidalariga asosan kelinga o‘z sepidagi mol-mulklarni olib berish haqida fuqarolik ishlari bo‘yicha Farg‘ona tumanlararo sudi avgust oyida qaror chiqarib, uni MIBga yuborgan.
Ijro hujjatiga asosan undiruvchi S.Y. foydasiga qarzdor M.A.dan jami 12 turdagi 10 million 900 ming so‘mlik mulklar olib berilishi ko‘rsatilgan. Kelin sepida 6 ta katta ko‘rpa, 6 ta kichik ko‘rpa, 8 ta davrixona, yostiq, 1 dona dazmol, 1 dona elektr choynak, 2 dona gilam 1 dona poyabzal qo‘yadigan va boshqa ashyolar ko‘rsatib o‘tilgan.
Olib borilgan majburiy ijro harakatlari davomida 17-sentyabr kuni undiruvchi S.Y.ga qarzdor M.A.dan jami mulklar to‘liq olib berilgan.
Seplarini MIB orqali undirgan kelinlar
Farg‘ona viloyati Qo‘qon shahrida kelin erining uyidan seplarini, 7 turdagi mulklarni MIB orqali undirib olgan. Shuningdek, Andijon viloyatida kelin erining uyidan seplarini, 43 turdagi buyumlar, uy jihozlari va anjomlarini MIB orqali qaytarib olgandi.
Shu kabi Qoraqalpog‘istonning Amudaryo tumanida kelinning sepi erining uyidan MIB orqali olib berilgan edi. Olib berilishi lozim bo‘lgan qarib 15 million so‘mlik 46 atamadagi sep mol-mulklar daʼvogarga olib berilib, sud qarori ijrosi amalda taʼminlangan.
Izoh (0)