O‘zbekiston—Germaniya sammiti yakunida daraxt ekish marosimi bo‘lib o‘tdi, deb xabar bermoqda Prezident matbuot xizmati.
Prezident Shavkat Mirziyoyev va Germaniya kansleri Olaf Shols Samraqanddagi Kongress markazi xiyobonida birgalikda daraxt ekdi.
Ta’kidlanishicha, bu O‘zbekiston—Germaniya ko‘p qirrali munosabatlarida yangi bosqich boshlangani, xalqlar o‘rtasidagi do‘stlik va hamkorlik rishtalari mustahkamlanib borayotganining ramzi bo‘ldi.
Shu bilan prezidentning Samarqandga tashrifi yakunlandi, davlat rahbari Toshkentga qaytib keldi.
Germaniya kansleri Olaf Shols Shavkat Mirziyoyevning taklifiga binoan 15-sentyabr kuni Samarqandga kelgandi. Tashrif davomida oliy darajadagi muzokaralar o‘tkazildi. Unda O‘zbekiston—Germaniya ko‘p qirrali hamkorligini yanada rivojlantirish masalalari ko‘rib chiqildi.
Muzokaralar yakunida Shavkat Mirziyoyev va Germaniya kansleri Olaf Shols Qo‘shma deklaratsiyani qabul qildi, 8 ta ikki tomonlama hujjat imzolandi. Bundan tashqari, 2024—2026-yillarga mo‘ljallangan Texnologik sheriklik va sanoat kooperatsiyasi dasturi qabul qilindi, shuningdek, O‘zbekiston va Germaniyaning yetakchi korxonalari darajasida bir qator bitim va shartnomalar tuzildi.
16-sentyabr kuni O‘zbekiston prezidenti va Germaniya kansleri ikki mamlakat ishbilarmon doiralari bilan uchrashuv o‘tkazdi. Shundan so‘ng ular qo‘shma Boshqaruv kadrlarini tayyorlash maktabini ishga tushirish marosimida ishtirok etdi.
Izoh (0)