So‘nggi kunlarda bir qator Yevropa mamlakatlari Falastin davlatini tan olish rejalarini e’lon qildi. AQSH davlat kotibi Marko Rubio esa Isroilning roziligisiz buni amalga oshirib bo‘lmasligini aytdi. Bu haqda Fox Radio xabar berdi.
Rubioning so‘zlariga ko‘ra, Yevropaning Falastinni tan olish niyatlari “aks natija beradi”.
Birinchidan, bu davlatlarning hech biri Falastin davlatini tuzish imkoniyatiga ega emas. Ikkinchidan, ular bu davlat qayerda joylashishini ham ayta olmaydi. Ular bu davlatni kim boshqarishini ham ayta olmaydi, dedi Rubio.
Uning fikricha, Falastin davlatini tan olish 2023-yil 7-oktyabrda Isroildagi musiqa festivaliga hujum qilib, odamlarni garovga olgan HAMAS guruhiga foyda keltiradi.
Agar men HAMAS bo‘lganimda, shunday derdim: bilasizlarmi, keling, o‘t ochishni to‘xtatishga rozi bo‘lmaylik. Agar HAMAS o‘t ochishni to‘xtatishga rozi bo‘lmasa, bu sentyabr oyida barcha mamlakatlar Falastin davlatini tan olishini kafolatlaydi. Shuning uchun ular o‘t ochishni to‘xtatishga rozi bo‘lmaydi, deya da’vo qildi AQSH davlat kotibi.
Biroq u Falastinni tan olish boshqa davlatlarning ichki ishi ekanini qayd etdi. Ammo bu G‘azo sektorida o‘t ochishni to‘xtatishda AQSHga “zarar keltirishi”ni aytdi.
Ular bu orqali yordam bermayapti, chunki ularning bayonoti HAMASni rag‘batlantirish va mukofotlashdan boshqa hech narsani o‘zgartirmaydi. Endi HAMASning dunyoda o‘t ochishni to‘xtatishga rozi bo‘lmaslik va garovga olinganlarni ozod qilmaslik uchun barcha sabablari bor, deya ta’kidladi AQSH davlat kotibi.
Falastinni tan olmoqchi bo‘lgan davlatlar
Isroilning G‘azoga hujumlari oqibatida halok bo‘lganlar soni 60 ming kishidan oshdi. Sektordagi gumanitar vaziyat og‘irligicha qolmoqda, ocharchilik tufayli hozirgacha 150 dan ortiq odam vafot etgan. Ularning aksariyati bolalar hisoblanadi. Qator davlatlar Isroildan blokadani to‘xtatish, G‘azoga gumanitar yordam kirishini ta’minlashni so‘ragan.
Mazkur chaqiriqlar fonida Buyuk Britaniya, Kanada, Portugaliya, Fransiya va Mali sentyabrda BMT Bosh assambleyasi sessiyasi boshlanishidan oldin Falastin davlatini tan olishga tayyorligini aytgan.
Bundan tashqari, yana 10 davlat: Andorra, Avstraliya, Kanada, Islandiya, Irlandiya, Lyuksemburg, Yangi Zelandiya, Norvegiya, San Marino, Sloveniya va Finlyandiya ham shunday qadam tashlash niyatida. Dunyo bo‘ylab 140 dan ortiq davlat Falastin davlatini tan olgan, Yevropa Ittifoqining 27 mamlakatidan 12 tasi shunday qaror qilgan.
O‘zbekistonning pozitsiyasi
Izoh (0)