“Xalqaro terrorchilik tashkilotlari davlatlarimizga qarshi buzg‘unchi rejalardan voz kechmagan” — Abdusalom Azizov

O‘zbeksiton DXX raisi Abdusalom Azizov xalqaro terrorizm, ekstremizm va kibertahdidlarga qarshi kurashish sohasida muntazam axborot va tajriba almashishga asoslangan izchil va muvofiqlashgan faoliyatda birga harakat qilish yordamidagina davlatlarda barqarorlik va xavfsizlikni ta’minlashda samarali natijalarga erishish mumkinligini aytdi.

4—5-sentyabr kunlari Toshkentda SHHTning Mintaqaviy aksilterror tuzilmasi (MATT) o‘ninchi xalqaro ilmiy-amaliy konferensiyasi va MDHning terrorizm va ekstremizga qarshi kurashish bo‘yicha ikkinchi konferensiyasi bo‘lib o‘tmoqda.

Abdusalom Azizov konferensiyaning yalpi majlisida so‘zga chiqib, SHHT va MDH makonida kechayotgan murakkab va qarama-qarshi harbiy-siyosiy jarayonlar mamlakatlardan xalqaro terrorizm, ekstremizm va radikalizmga qarshi kurashda sa’y-harakatlar va muvofiqlashtirilgan chora-tadbirlarni birlashtirishni talab etishini ta’kidladi.

“Bu holat SHHTga a’zo davlatlar xavfsizligiga bevosita  tahdid soladi. Vaziyat xalqaro terrorchilik tashkilotlari boshliqlarining davlatlarimizga qarshi o‘zlarining buzg‘unchi rejalaridan voz kechmagani bilan yanada murakkablashmoqda”, dedi DXX raisi.

Uning ta’kidlashicha, Afg‘oniston hukumati o‘z imkoniyatlari va resurslaridan kelib chiqib, xalqaro terrorizmga qarshi kurashmoqda, afg‘on maxsus xizmati IDXVga qarshi kurashda yetakchilik qilib, muayyan natijalarga erishmoqda. Shu bois dushmanga qarshi birgalikda kurashish kerak.

Abdusalom Azizov “Xuroson viloyati”ga qarshi kurashda Afg‘onistonga yordam ko‘rsatish muhimligini, chunki qarshi choralarni zaiflashtirish bu guruhning kuchayishiga sabab bo‘lishini, bu esa o‘z navbatida, mintaqa xavfsizligiga xavf solishini aytdi.

“Ishonchim komilki, o‘zaro ishonch, xalqaro terrorizm, ekstremizm va kibertahdidlarga qarshi kurashish  sohasida muntazam axborot va tajriba  almashishga asoslangan izchil va muvofiqlashgan faoliyatda birga harakat qilish yordamidagina davlatlarimizda barqarorlik va xavfsizlikni ta’minlashda samarali natijalarga erishish mumkin”, dedi Abdusalom Azizov.

DXX raisi shu bois bugungi kunda xalqaro anjumanni o‘tkazish dolzarbligini, uning doirasida ishtirokchilar chaqiriqlar va xavfsizlik tahdidlarining bugungi holatini muhokama qilish, samarali qarshi kurash choralarini ishlab chiqish, xalqaro va mintaqaviy darajada aksilterror hamkorligini mustahkamlash imkoniga ega bo‘lishini qayd etdi.