Ўзбекситон ДХХ раиси Абдусалом Азизов халқаро терроризм, экстремизм ва кибертаҳдидларга қарши курашиш соҳасида мунтазам ахборот ва тажриба алмашишга асосланган изчил ва мувофиқлашган фаолиятда бирга ҳаракат қилиш ёрдамидагина давлатларда барқарорлик ва хавфсизликни таъминлашда самарали натижаларга эришиш мумкинлигини айтди.
4—5 сентябрь кунлари Тошкентда ШҲТнинг Минтақавий аксилтеррор тузилмаси (МАТТ) ўнинчи халқаро илмий-амалий конференцияси ва МДҲнинг терроризм ва экстремизга қарши курашиш бўйича иккинчи конференцияси бўлиб ўтмоқда.
Абдусалом Азизов конференциянинг ялпи мажлисида сўзга чиқиб, ШҲТ ва МДҲ маконида кечаётган мураккаб ва қарама-қарши ҳарбий-сиёсий жараёнлар мамлакатлардан халқаро терроризм, экстремизм ва радикализмга қарши курашда саъй-ҳаракатлар ва мувофиқлаштирилган чора-тадбирларни бирлаштиришни талаб этишини таъкидлади.
“Бу ҳолат ШҲТга аъзо давлатлар хавфсизлигига бевосита таҳдид солади. Вазият халқаро террорчилик ташкилотлари бошлиқларининг давлатларимизга қарши ўзларининг бузғунчи режаларидан воз кечмагани билан янада мураккаблашмоқда”, деди ДХХ раиси.
Унинг таъкидлашича, Афғонистон ҳукумати ўз имкониятлари ва ресурсларидан келиб чиқиб, халқаро терроризмга қарши курашмоқда, афғон махсус хизмати ИДХВга қарши курашда етакчилик қилиб, муайян натижаларга эришмоқда. Шу боис душманга қарши биргаликда курашиш керак.
Абдусалом Азизов “Хуросон вилояти”га қарши курашда Афғонистонга ёрдам кўрсатиш муҳимлигини, чунки қарши чораларни заифлаштириш бу гуруҳнинг кучайишига сабаб бўлишини, бу эса ўз навбатида, минтақа хавфсизлигига хавф солишини айтди.
“Ишончим комилки, ўзаро ишонч, халқаро терроризм, экстремизм ва кибертаҳдидларга қарши курашиш соҳасида мунтазам ахборот ва тажриба алмашишга асосланган изчил ва мувофиқлашган фаолиятда бирга ҳаракат қилиш ёрдамидагина давлатларимизда барқарорлик ва хавфсизликни таъминлашда самарали натижаларга эришиш мумкин”, деди Абдусалом Азизов.
ДХХ раиси шу боис бугунги кунда халқаро анжуманни ўтказиш долзарблигини, унинг доирасида иштирокчилар чақириқлар ва хавфсизлик таҳдидларининг бугунги ҳолатини муҳокама қилиш, самарали қарши кураш чораларини ишлаб чиқиш, халқаро ва минтақавий даражада аксилтеррор ҳамкорлигини мустаҳкамлаш имконига эга бўлишини қайд этди.
Изоҳ (0)