Jeff Bezos asos solgan Blue Origin kompaniyasi kosmik sayohatlar uchun kriptovalyuta orqali to‘lov qabul qilishni boshladi. Bu haqda Business Wire xabar berdi.
Endi mijozlar Bitcoin, Ethereum, Solana kabi kriptovalyutalar, shuningdek, USDT va USDC kabi steyblkoinlar yordamida chipta xarid qilishi mumkin. To‘lovlar Shift4 Payments kompaniyasi orqali amalga oshiriladi. Mijozlar Coinbase yoki MetaMask kabi keng tarqalgan kripto-hamyonlardan foydalanib, oson va xavfsiz tranzaksiya qilishi mumkin.
Biz kriptovalyuta va steyblkoinlar qimmat xaridlarni amalga oshirishda ommalashishiga ishonamiz. Chunki bunday tranzaksiyalar ham iste’molchi, ham sotuvchi uchun moliyaviy jihatdan foydali, dedi Shift4 kriptovalyutalar bo‘limi boshlig‘i Aleks Uilson.
2021-yil yozida Blue Origin o‘zining ilk suborbital parvozida Bezos bilan birga uchadigan o‘rinni auksionda 28 million dollarga sotgandi. Savdoda 159 mamlakatdan 7,6 mingdan ortiq kishi qatnashdi. Ushbu o‘rinni kriptomilliarder va Tron blokcheynining asoschisi Jastin San xarid qildi. U o‘sha parvozda ishtirok etolmagan, biroq 2025-yil avgustida nihoyat kosmosga yo‘l olgandi.
Kosmosga chipta narxi qancha turadi?
Blue Origin o‘rtacha chipta narxini oshkor qilmaydi. Kompaniya saytiga ko‘ra, buyurtma jarayonini boshlash uchun 150 ming dollar miqdorida qaytariladigan depozit talab qilinadi. 2021-yilda New Shepard komsik kemasidagi eng yuqori narx 28 million dollar bo‘lgan. Shu yili “Yulduz yo‘li” filmi aktyori Uilyam Shatner Blue Origin’ning maxsus mehmoni sifatida bepul uchgan.
2018-yilda kompaniya yo‘lovchilardan kamida 200 ming dollar olishni rejalashtirgani ma’lum bo‘ldi. Blue Origin xarajatlarni kamaytirish va raketalarni qayta foydalanishga mo‘ljallash ustida ishlamoqda. Buyuk Britaniyadagi Uorik biznes maktabi professori Loizos Gerakleus hisob-kitoblariga ko‘ra, New Shepard’ning har bir parvozi 1—3 million dollar oralig‘ida baholanadi.
Izoh (0)