Жефф Безос асос солган Blue Origin компанияси космик саёҳатлар учун криптовалюта орқали тўлов қабул қилишни бошлади. Бу ҳақда Business Wire хабар берди.
Энди мижозлар Bitcoin, Ethereum, Solana каби криптовалюталар, шунингдек, USDТ ва USDC каби стейблкоинлар ёрдамида чипта харид қилиши мумкин. Тўловлар Shift4 Payments компанияси орқали амалга оширилади. Мижозлар Coinbase ёки MetaMask каби кенг тарқалган крипто-ҳамёнлардан фойдаланиб, осон ва хавфсиз транзакция қилиши мумкин.
Биз криптовалюта ва стейблкоинлар қиммат харидларни амалга оширишда оммалашишига ишонамиз. Чунки бундай транзакциялар ҳам истеъмолчи, ҳам сотувчи учун молиявий жиҳатдан фойдали, деди Shift4 криптовалюталар бўлими бошлиғи Алекс Уилсон.
2021 йил ёзида Blue Origin ўзининг илк суборбитал парвозида Безос билан бирга учадиган ўринни аукционда 28 миллион долларга сотганди. Савдода 159 мамлакатдан 7,6 мингдан ортиқ киши қатнашди. Ушбу ўринни криптомиллиардер ва Трон блокчейнининг асосчиси Жастин Сан харид қилди. У ўша парвозда иштирок этолмаган, бироқ 2025 йил августида ниҳоят космосга йўл олганди.
Космосга чипта нархи қанча туради?
Blue Origin ўртача чипта нархини ошкор қилмайди. Компания сайтига кўра, буюртма жараёнини бошлаш учун 150 минг доллар миқдорида қайтариладиган депозит талаб қилинади. 2021 йилда New Shepard комсик кемасидаги энг юқори нарх 28 миллион доллар бўлган. Шу йили “Юлдуз йўли” фильми актёри Уилям Шатнер Blue Origin’нинг махсус меҳмони сифатида бепул учган.
2018 йилда компания йўловчилардан камида 200 минг доллар олишни режалаштиргани маълум бўлди. Blue Origin харажатларни камайтириш ва ракеталарни қайта фойдаланишга мўлжаллаш устида ишламоқда. Буюк Британиядаги Уорик бизнес мактаби профессори Лоизос Гераклеус ҳисоб-китобларига кўра, New Shepard’нинг ҳар бир парвози 1—3 миллион доллар оралиғида баҳоланади.
Изоҳ (0)