AQSH prezidenti Donald Tramp 7-avgust kuni Savdo vazirligiga mamlakat aholisini qayta ro‘yxatga olish borasida topshiriq berdi. Unga ko‘ra, endilikda Qo‘shma Shtatlarda noqonuniy yashayotgan migrantlar ro‘yxatga kiritilmaydi. Bu haqda CNN xabar berdi.
Ma’lum qilinishicha, siyosatchi bu tashabbusni 2024-yilgi prezidentlik saylovi natijalari va so‘nggi ma’lumotlar asosida shakllantirishni istamoqda.
“Men Savdo vazirligiga aholini qayta ro‘yxatga olish to‘g‘risida topshiriq berdim. Bu ro‘yxat zamonaviy faktlar va raqamlar asosida, muhimi, 2024-yilgi prezident saylovi natijalari ma’lumotlaridan foydalangan holda shakllantirilishini istayman. Mamlakatimizda noqonuniy yashayotgan odamlar bu ro‘yxatga kiritilmaydi”, degan Tramp o‘zining Truth Social ijtimoiy tarmog‘ida.
AQSH Konstitutsiyasi har 10 yilda bir marta mamlakatdagi aholini ro‘yxatga olishni ko‘zda tutadi. Tarixan ro‘yxatga olish jarayonida immigratsiya maqomidan qat’iy nazar, mamlakatda istiqomat qiladigan barcha hisobga olingan. Trampning tegishli taklifi esa bu amaliyotda keskin burilish yasamoqda.
Mutaxassislar prezidentning bu qarorini amalga oshirish juda murakkabligini va bu yirik sud jarayonlariga aylanib ketishini bildirgan. Shuningdek, Trampning 2024-yilgi saylov natijalaridan foydalanish haqidagi g‘oyasi qonuniy va amaliy jihatdan asosga ega emasligi ta’kidlanmoqda. Ma’lumot uchun, Tramp o‘zining birinchi prezidentlik davrida ham 2020-yilgi aholini ro‘yxatga olish jarayoniga o‘zgartirish kiritmoqchi bo‘lgan, ammo AQSH Oliy sudi bunga qarshi chiqqan edi.
Izoh (0)