Rossiya har yili mingdan ortiq “Iskander” va “Kinjal” raketalarini ishlab chiqarmoqda — Ukraina razvedkasi

Rossiya harbiy sanoati Ukraina shaharlariga zarbalarda qo‘llaniladigan “Iskander” va “Kinjal” ballistik raketalaridan har yili 1 020 tagacha ishlab chiqarayotgan bo‘lishi mumkin. Ulardan birinchisi quruqlik platformalaridan, ikkinchisi esa MiG-31K samolyotlaridan ishga tushiriladi.

Ukraina harbiy razvedkasining hisob-kitoblariga ko‘ra, 2025-yilning birinchi yarmida “Iskander” raketalarining ishlab chiqarish hajmi 2024-yildagi prognozlarga nisbatan 15–40 foizga oshgan. Bu nafaqat Ukraina, balki uning ittifoqchilariga ham tahdid solmoqda.  

Ekspertlarning ta’kidlashicha, Yevropa hozirgi imkoniyatlari bilan har yili atigi 300 ta ballistik tahdidni zararsizlantira oladi. Bunga sabab sifatida bitta ballistik raketani yo‘q qilish uchun qoidaga binoan ikkita tutib oluvchi raketa uchirilishi keltirilgan. Bunday raketalar qimmat bo‘lishi bilan bir qatorda, ularni ishlab chiqarish ham murakkab texnologik jarayon hisoblanadi.  

Shu sabab mutaxassislar havo hujumidan mudofaa salohiyatini oshirish, Ukrainaga nafaqat himoya, balki hujumkor qurollarni ham berish kabi taklifini ilgari surmoqda. Ularning fikricha, bunday sharoitda ukrainaliklar Rossiyaning ballistik raketalar ishlab chiqaradigan infratuzilmasini nishonga olishi mumkin. 

Ular o‘zi qanday qurollar?

“Iskander-M” taktik raketa kompleksi Ukraina shaharlariga zarbalarda qo‘llaniladigan asosiy vositalardan biri hisoblanadi. Biroq yadroviy kallaklarni ham tashishi mumkin. Tizim “KB Mashinostroyeniya” konstruktorlik byurosi tomonidan ishlab chiqilgan.

Rasmiy press-relizga ko‘ra, u 500 km masofaga zarba bera oladi. Biroq ba’zi ekspertlar mazkur ko‘rsatkich o‘zaro muvofiqlashtiruvchi me’yorlarni chetlab o‘tish uchun atayin yashirilishini, aslida tizim 1 500 km gacha masofaga zarba bera olishini aytishadi.  X-47M2 “Kinjal” esa Rossiya prezidenti tomonidan eng ko‘p tilga olingan qurollardan biri hisoblanadi.

Aslini olganda, u Iskander tizimida qo‘llaniladigan ballistik raketaning havodan ishga tushirishga mo‘ljallangan versiyasidir. Rossiyaliklar ushbu modeldagi raketalarni modernizatsiya qilingan MiG-31K samolyotlaridan uchiradi.