Toshkent viloyatining Bo‘stonliq tumanida joylashgan 7-sonli jazoni ijro etish koloniyasida jazo muddatini o‘tayotgan mahkum vafot etdi. Bu haqda Bosh prokuratura matbuot xizmati xabar berdi.
Ma’lum qilinishicha, 11-fevral kuni 7-sonli jazoni ijro etish koloniyasida jazo muddatini o‘tagan mahkum Mustafa Tursinbayev bir qavatli binoning devorlarini buzayotgan vaqtida devor qismi qulab, bosib qolgan.
U zudlik bilan shifoxonaga joylashtirilgan. Biroq shifokorlar tomonidan ko‘rsatilgan tibbiy muolajalarga qaramasdan, mahkum 16-fevral kuni shifoxonada vafot etgan.
Mazkur holat bo‘yicha Jinoyat kodeksining 257-moddasi (mehnatni muhofaza qilish qoidalarini buzish) bilan jinoyat ishi qo‘zg‘atilgan. Hozirda Toshkent maxsus prokuraturasi tomonidan tergov harakatlari olib borilmoqda.
Bundan avval IIV Jazoni ijro etish departamentining Olmaliqdagi 14-sonli koloniyasida jazoni o‘tayotgan 21 yashar mahkum vafot etgani haqida xabar berilgan edi. Ushbu holat yuzasidan ham Toshkent maxsus prokuraturasi tomonidan tergovga qadar tekshiruv harakatlari olib borilmoqda.
Izoh (0)