• Profilga Kirish
  • 1751972643_633.png 1751972643_245.png 1751959824_218.svg 1751959824_520.svg

  • So‘nggi yangiliklar
  • Asosiy yangiliklar
  • Eng ko‘p o‘qilgan
  • Kolumnistlar
Ўзбекча
Русский
English
  • O'zb
  • Ўзб
  • Рус
  • Eng
  • O'zb
  • Ўзб
  • Рус
  • Eng
  • So‘nggi yangiliklar
  • Asosiy yangiliklar
  • Eng ko‘p o‘qilgan
  • Kolumnistlar
    • USD12603.52
    • RUB160.94
    • EUR14676.8
    • Google play
    • App Store
    • Telegram
    • Toshkentda
      +33°C
      • Andijon
      • Qarshi
      • Buxoro
      • Samarqand
      • Farg‘ona
      • Sirdaryo
      • Jizzax
      • Termiz
      • Namangan
      • Toshkent
      • Navoiy
      • Toshkent vil
      • Nukus
      • Urganch
    • Daryo
      • Internet-nashr
      • Tahririyat haqida
      • Aloqa ma'lumotlari
      • Foydalanish shartlari
      • Maxfiylik siyosati
      • Yangiliklar arxivi
    • Reklama
    • Ijtimoiy tarmoqlar
      • Instagram | Rasmiy
      • Instagram | Lifestyle
      • Instagram | Sport
      • Facebook | Rasmiy
      • OK | Rasmiy
      • YouTube | Daryo
      • YouTube | Daryo Rus tilida
      • YouTube | Daryo Global
    Telegram Youtube Facebook Instagram Twitter vkontakte
    Daryo logo white
    • O‘zbekiston
      • Boshqalar
      • Navoiy
      • Toshkent viloyati
      • Sirdaryo
      • Jizzax
      • Qashqadaryo
      • Surxondaryo
      • Xorazm
      • Buxoro
      • Samarqand
      • Namangan
      • Farg‘ona
      • Andijon
      • Qoraqalpog‘iston
      • Toshkent sh.
      • Mehridaryo
      • Ob-havo
    • Markaziy Osiyo
      • O‘zbekiston (Mahalliy)
      • Afg'oniston
      • Qirg‘iziston
      • Qozog‘iston
      • Turkmaniston
      • Tojikiston
    • Dunyo
    • Pul
      • Biznes
      • Iqtisodiyot
      • Moliya
      • Kripto
    • Madaniyat
      • Kino
      • Kitob
      • Musiqa
      • Shou-biznes
    • Layfstayl
      • Ayollar sahifasi
        • Farzand
        • Go‘zallik
        • Karyera
        • Maslahatlar
        • Moda
        • Retseptlar
      • Texnologiyalar
        • Arxitektura
        • Gadjetlar
        • Ilm-fan
        • Koinot
        • Media
      • Avto
      • Qo‘ziqorin
      • Sayohat
      • Salomatlik
      • Ta’lim
        • Abituriyent
        • Ingliz tilini o’rganamiz
    • Sport
      • Futbol
      • UFC
      • Boks
    infinix
    Daryo.uz - Login
    Daryo.uz Daryo.uz
    Daryo.uz - Login
    Dunyo

    Chexoslovakiya va Ukrainaning o‘xshash taqdiri – Gitler o‘z bosqinchilik harakatlarini qanday boshlagan edi?

    2022-yil 24-fevralda Rossiya armiyasi Ukrainaga bostirib kirdi va uning ancha qismini bosib oldi. Bungacha 2014-yilda ruslar Ukrainaning Donesk va Lugansk viloyatlari hamda Qrimni egallab olgandi. O‘shanda Rossiya o‘z xatti-harakatlarini Ukrainada yashab kelgan ruslarni himoya qilish bilan oqlagandi. Rossiya armiyasi Ukrainaga hujum qilar ekan, tarixchilar 1938-yilda Germaniyaning Chexoslovakiyaga bostirib kirganini eslashdi. O‘shanda Gitler ham o‘z bosqinchiligini Chexoslovakiyada yashayotgan nemislarni himoya qilish bilan oqlagan edi.

    Xirosima shahri amerikaliklar bomba tashlagandan so‘ng shu ko‘rinishga keladi

    Ikkinchi jahon urushi millionlab qurbonlar, vayronagarchiliklar va dunyo siyosiy sahnasida juda katta o‘zgarishlarga sabab bo‘lish bilan birga, turli harbiy texnikalar takomillashuvini ham tezlashtirgandi.

    Jumladan, bu urush tugamasdanoq atom bomba yaratildi va Yaponiyaning ikkita shahriga tashlandi. O‘shanda amerikaliklar bir necha yuz minglab insonlarning halok bo‘lishi evaziga bu dahshatli qurolni sinovdan o‘tkazib olishadi.

    Urushdan so‘ng ko‘p o‘tmay uzoq masofaga uchuvchi raketalar yasab chiqiladi. Harbiy kemalar va samolyotlar takomillashtiriladi. Qisqasi, o‘sha vayronkor urushdan yetarli xulosa chiqarmagan insoniyat qayta qurollanish uchun mislsiz hisobda mablag‘ sarflay boshlaydi.

    Shuningdek, ikkinchi jahon urushidan so‘ng hozirgacha juda ko‘plab urushlar bo‘lib o‘tadi. So‘nggi jiddiy urush 2022-yil 24-fevral kuni boshlandi va o‘shanda Rossiya armiyasi qo‘shni Ukrainaga bostirib kirdi.

    Ana shu paytda tarixchilar yana Ikkinchi jahon urushining bosh aybdori Gitler Germaniyasining bosqinchilik siyosatini eslab qolishdi.

    Chunki, 2022-yil 24-fevral kuni Rossiya armiyasi Ukrainaga bostirib kirishini Moskvadagilar bu mamlakatda yashab kelgan ruslarni himoya qilish deb oqlagan bo‘lsa, Gitler ham 1938-yilda Chexoslovakiyaga hujum qilishini shu yerda yashovchi nemislarni himoya qilish maqsadida degan edi.

    O‘shanda jahon afkor ommasi va turli davlatlar Gitlerning Chexoslovakiyaga bostirib kirganiga tomoshabin bo‘lib turishadi va fashistlarga qarshi hech qanday chora ko‘rishmaydi. Oqibatda Gitlerning “ishtahasi ochilib” butun Yevropani egallashga qaror qiladi.

    Tarixchilar, agar o‘shanda jahon hamjamiyati, ayniqsa Yevropa davlatlari birlashib, Gitler Germaniyasiga qarshi jiddiy chora ko‘rganida Ikkinchi jahon urushi boshlanmasligi ham ham mumkin deyishadi. Balki...

    Gitlerning hokimiyat tepasiga kelishi

    1933-yilda 44 yoshida Germaniyada hokimiyat tepasiga kelgan Gitler nemis milliy-sotsialistik ishchilar partiyasi vakili edi. U Avstriyada tug‘ilgan va keyinchalik Germaniyaga ko‘chib o‘tgandi. So‘ng nemis milliy-sotsialistik ishchilar partiyasi a’zosiga, 1921-yilda lideriga aylangandi.

    Gitler hokimiyat tepasiga kelar ekan, birinchi navbatda 1933-yil 14-oktyabr kuni Jenevada o‘tkazilayotgan qurollanishni to‘xtatish bo‘yicha konferensiyasidan namoyishkorona chiqib ketadi.

    Oradan bir yil o‘tib 1934-yilda Gitler o‘zini fyurer deb e’lon qiladi va mamlakat qurolli kuchlari bosh qo‘mondoniga aylanadi. Shundan so‘ng Germaniya zo‘r berib qurollana boshlaydi.

    Gitler hokimiyat tepasida mustahkam o‘rnashib olgach Germaniya aholisi orasida o‘zining nasistik g‘oyalarini yoyishga o‘tadi va nemislarni oliy irq deb e’lon qiladi. Uning g‘oyalariga ko‘ra dunyodagi barcha millatlar nemislarga bo‘ysunishi va xizmat qilishi kerak edi.

    Gitler birinchi navbatda Germaniya armiyasini zamonaviy harbiy texnikalar bilan qurollantiradi. Shuningdek, harbiy xizmatchilar soni keskin ko‘paytiriladi.

    Armiya yetarli darajada kuchaytirilgach 1936-yildan boshlab Germaniya o‘z qo‘shnilari Polsha, Chexoslovakiya va Avstriya kabi davlatlarga hududiy da’volar bilan chiqadi.

    Avstriya va Chexoslovakiyaning egallanishi

    1937-yilda Gitler o‘z qo‘mondonlari bilan Yevropani egallash bo‘yicha maxfiy yig‘ilish o‘tkazadi. Ana shu yig‘ilishda birinchi bo‘lib Yevropadagi yana bir nemis davlati bo‘lgan Avstriyani egallash reja qilinadi.

    Ana shu rejaga muvofiq, 1938-yil 12-mart kuni Germaniya armiyasi Avstriyaga bostirib kiradi va uch kunda bu mamlakatni to‘liq egallaydi. Shundan so‘ng soxta referendum (2014-yil Qrimda bo‘lgani kabi) o‘tkaziladi va uning “natijasi”da Avstriya Germaniyaga qo‘shilgani e’lon qilinadi.

    Avstriyani osongina o‘z davlatiga qo‘shib olgach Gitler endi Chexoslovakiyaga “ko‘z olaytira boshlaydi”. O‘sha paytda bu davlatning Germaniya bilan chegaradosh bo‘lgan Sudet viloyatida asosan etnik nemislar yashardi.

    1938-yil sentyabrda Gitler Chexoslovakiya hukumatidan Sudet viloyatini Germaniya berishni talab qiladi va aks holda bu ishni qurol yordamida amalga oshirishini aytadi.

    O‘sha yili 29-sentyabr kuni Myunxenda Britaniya bosh vaziri Nevill Chemberlen va Fransiya bosh vaziri Eduard Daladiye, Italiya bosh vaziri Benito Mussolini va Gitler tomonidan “Myunxen kelishuvi” imzolanadi.

    “Myunxen kelishuvi”ni imzolaganlar

    Bu kelishuvda Britaniya, Fransiya va Italiya bosh vazirlari Chexoslovakiyaga 10 kun ichida Sudetni Germaniyaga topshirishi lozimligi talabini qo‘yishadi. O‘shanda Gitler yuqoridagi davlatlar bosh vazirlariga agar Chexoslovakiya Sudetni urushsiz topshirsa bu mamlakatga bostirib kirmaslikka va’da beradi. Chexoslovakiyaning bu talabga rozi bo‘lishdan boshqa chorasi qolmaydi.

    1938-yil 1-oktyabr kuni Germaniya armiyasi Chexoslovakiyaga kiradi va Sudetni egallaydi. Biroq Gitler o‘z va’dasida turmaydi va 1939-yil bahorda nemislar Chexoslovakiyaga yana bostirib kirishadi va uni bir qancha vassal davlatlarga bo‘lib yuborishadi.

    Jumladan, Slovakiya va Podkarpat Rus o‘lkasi (G‘arbiy Ukraina) o‘zini mustaqil deb e’lon qiladi. Bogemiya va Moraviya Germaniya vassaliga (protektorati) aylanadi.

    Gitlerning keyingi “o‘ljalari”

    Britaniya va Fransiyaning Sudetni egallanishiga qarshilik qilmasligi Gitlerni “ilhomlantiradi” va u 1939-yil yozda navbatdagi davlat — Polshaga hujum qilishga tayyorgarlik ko‘ra boshlaydi.

    Biroq bu safar Britaniya va Fransiya jim turmasligi mumkin edi. Shu sababli Gitler o‘ziga ittifoqchi qidira boshlaydi. Germaniya tashqi ishlar vazirligi avval Fransiya va Buyuk Britaniya hukumati bilan muzokaralar o‘tkazadi. Biroq ular Gitlerning bosqinchilik siyosatiga mutlaqo qarshi chiqadi.

    Shundan so‘ng nemislar SSSR bilan muzokara boshlaydi va kutilmaganda sovetlar Berlinning taklifiga ijobiy javob berishadi. Muzokaralar davomida ma’lum bo‘ladi-ki, sovetlar Sharqiy Yevropadagi o‘ziga qo‘shni bo‘lgan davlatlarning ma’lum bir hududlarini bosib olish evaziga, nemislarning bosqinchilik siyosatiga qarshi emas.

    Kelishuvga ko‘ra, 1939-yil yozda SSSR va Germaniya o‘rtasida “O‘zaro hujum qilmaslik” haqida kelishuv imzolanishi kerak edi. Biroq bir narsa bu ishga xalaqit beradi. Gap shundaki o‘sha paytda SSSR tashqi ishlar vaziri Maksim Litvinov edi.

    Haqiqiy ism-sharifi Meyer-Genox Moiseyevich Vallax bo‘lgan Litvinovning millati yahudiy edi. Stalin Gitler bilan o‘zaro hujum qilmaslik haqida kelishuvga erishgan paytda nemislar aynib qolishadi. Ular kelishuvni millati yahudiy bo‘lgan Litvinov bilan imzolashni xohlamaydi.

    Shundan so‘ng 1939-yil 3-may kuni Stalin Litvinovni tashqi ishlar xalq komissari lavozimidan bo‘shatadi va o‘rniga Vyacheslav Molotovni tayinlaydi. Oradan qariyb to‘rt oy o‘tgach, 1939-yil 23-avgust kuni Germaniya tashqi ishlar vaziri Iohim fon Ribbentrop Moskvaga tashrif buyuradi va kelishuv imzolanadi.

    Shartnomani imzolash paytida Stalin va Molotovning yonida yana bir qancha sovet mulozimlari hamda Ribbentropning yordamchisi Andor Henke, Germaniyaning SSSRdagi elchisi Verner Shulenburg, shuningdek, tarjimon ham bo‘lgan.

    Shartnoma imzolangandan so‘ng Kremlda Ribbentrop sharafiga ziyofat beriladi. Unda Stalin va Molotov navbati bilan “hurmatli mehmon” sharafiga qadah ko‘tarishni taklif etib turishadi va nemis xalqi sha’niga maqtov yog‘dirishadi.

    Voqea guvohi bo‘lganlarning eslashicha ziyofat oxirida Stalin Ribbertropga SSSR shartnoma shartlariga amal qilishga jiddiy qarashini ta’kidlaydi va “So‘z beraman, Sovet ittifoqi o‘z hamkorlarini sotmaydi”, deydi.

    Ribbentrop (chapdan birinchi), Stalin va Molotov (o‘ngdan birinchi)

    Oradan bir hafta o‘tib, 1939-yil 31-avgust kuni shartnoma SSSR oliy kengashi tomonidan ratifikatsiya qilinadi. Buni kutib turgan nemislar ertasi kuni 1-sentyabrda Polshaga hujum boshlaydi.

    Nemislar qariyb uch haftada Polshaning katta qismini bosib olishadi. Shundan so‘ng 17-sentyabr kuni bu davlatga sharqdan sovet armiyasi bostirib kiradi va ko‘p o‘tmay SSSR va Germaniya Polshani to‘liq bosib olishadi.

    O‘shanda Germaniya Polshaga hujum qilganda Britaniya va Fransiya bu davlatga urush e’lon qiladi. Biroq Polshaning qariyb yarmini egallagan SSSRga qarshi negadir bunday yo‘l tutishmaydi.

    Gitler va Stalinning keyingi bosqinchilik yurishlari

    SSSR va Germaniya Polshani o‘zaro taqsimlab olgach yangi yurishlarga tadorik ko‘ra boshlashadi. 1939-yil 30-noyabr kuni sovet armiyasi Finlyandiyaga bostirib kiradi. Nemislar ham qarab turishmaydi. Ular Sharqiy Yevropada joylashgan Vengriya, Bolgariya, Ruminiya kabi davlatlarni bosib olib vassal davlatlarga aylantirishadi.

    Bu davrda Finlyandiyaga hujum qilgan sovetlar muvaffaqiyatsizlikka uchraydi va urush boshlangandan 100 kun o‘tgach, 1940-yil mart oyi boshlarida finlar bilan mag‘lubiyatga teng sulh imzolaydi.

    O‘shanda jasur fin xalqi SSSR armiyasiga juda katta talafot yetkazadi va uch oyda 100 mingdan oshiq sovet harbiylarini o‘ldirishga va undan ko‘pini yarador qilishga muvaffaq bo‘ladi. Shuningdek, “Molotov kokteyli”ni qo‘llab ko‘p miqdordagi sovet harbiy texnikalarini ishdan chiqaradi.

    1940-yilning bahorida, aniqrog‘i aprel oyida Gitler  avvaliga Daniyani, so‘ng Norvegiya va Yugoslaviyani, may oyida Belgiya, Niderlandiya, Lyuksemburg hamda Fransiyani egallaydi.

    O‘shanda nemislar Britaniyani ham zabt etishni rejalashtirishgandi. Biroq quruqlikdagi qo‘shinlarni La-Mansh bo‘g‘ozidan olib o‘tishni iloji bo‘lmaydi. Shu sababli ular Britaniyaga samolyotlar yordamida aviabombalar tashlashadi.

    Umumiy hisobda 1940-yil oxiriga kelib Yevropa to‘liq Germaniya qo‘l ostiga o‘tadi. O‘sha paytda Italiyada Mussolini, Ispaniyada esa general Franko hukmdorlik qilardi va ular Gitler bilan ittifoqdosh edi. Shu sababli bu ikki davlat nemislar okkupatsiyasidan qutilib qoladi.

    Chang‘ida harakatlanayotgan fin partizanlari

    Finlyandiyada muvaffaqiyatsizlikka uchragan sovetlar 1940-yilda Ruminiyadan Bessarabiya va Shimoliy Bukovinani tortib olishadi. Shuningdek, Boltiqbo‘yida joylashgan Latviya, Litva va Estoniyani bosib olishadi.

    O‘shangacha Boltiqbo‘yi Germaniya nazoratida edi. “Mloltov-Ribbentrop pakti”ning maxfiy qismidagi kelishuvga ko‘ra nemislar u yerni sovetlarga topshirishadi.

    Yangitdan egallangan hududlarda Moldaviya SSR, Litva SSR, Latviya SSR va Estoniya SSR nomlari bilan ittifoqdosh respublikalar tashkil etiladi.

    Shuningdek, ungacha sovetlar 1939-yilda Chexoslovakiyadan bir tomonlama ozod bo‘lib, o‘zini mustaqil deb e’lon qilgan Podkarpat o‘lkasini ham bosib olgandi.

    Ikkinchi jahon urushining oqibati hammaga ma’lum. Ko‘plab mamlakatlar vayronaga aylanadi. Dunyo bo‘ylab 70 milliondan oshiq odam halok bo‘ladi. Bundan ham ko‘proq odam nogiron bo‘ladi. Yaponiyaga atom bomba tashlanadi. Biroq insoniyat o‘sha urushdan ham yetarlicha xulosa chiqarmadi va dunyoning turli burchaklarida hanuzgacha urushlar davom etyapti.

    O‘xshash ssenariy: Rossiyaning Ukrainaga bosqini

    Yuqorida Gitler Germaniyasining o‘z bosqinchilik yurishlarini qanday boshlagani va eng avval Chexoslovakiyani qay ko‘yga solganini ko‘rib chiqdik. Bugun davom etayotgan Rossiya—Ukraina urushidagi ayrim holatlar Ikkinchi jahon urushi davrida sodir bo‘lgan hodisalarga juda o‘xshash. Quyida shularni ko‘rib chiqamiz.

    1. Ruslarni himoya qilish. 2014-yilda Ukraina sharqida joylashgan Lugansk va Donesk shahrining rus aholisi Kiyev hokimiyatiga qarshi bosh ko‘tardi. Ularni Rossiya armiyasi qo‘lladi va qisqa vaqtda ikkita viloyatning ma’lum qismi o‘z mustaqilligini e’lon qildi.

    O‘shanda Rossiya Ukrainaga qo‘shin kiritdi va bu xatti-harakatlarini Ukraina sharqidagi ruslarni himoya qilish deb oqladi. Tarixchilar Moskvaning bu ishi 1938-yilda Germaniyaning etnik nemislarni himoya qilish maqsadida Chexoslovakiyaning Sudet viloyatiga bostirib kirgani va uni egallagani bilan bir xil bo‘ldi deb baholashdi.

    2022-yilgacha LNR va DNRning hududi juda kichik bo‘lgan. Undan keyin Rossiya Ukrainaning katta hududini bosib oldi

    Aytgancha, 2014-yilda Ukraina sharqida ayirmachilar Donesk xalq respublikasi va Lugansk xalq respublikasi tuzilganini e’lon qilgandi. Biroq 2022-yil 24-fevralda Rossiya Ukrainaga bostirib kirganidan ko‘p o‘tmay yuqoridagi respublikalarning o‘zini o‘zi boshqarish tuzumi yo‘q qilindi va ular Rossiya subyekti deb e’lon qilindi.

    1. Tongda bostirib kirish. 2022-yil 24-fevral kuni Rossiya armiyasi Ukrainaga erta tongda, soat 4 da bostirib kiradi. Bu nemislarning SSSRga 1941-yil 22-iyun kuni tongi soat 4 da bostirib kirganiga o‘xshaydi.

    Har ikki holatda ham odamlar uxlab yotgan paytda hujum boshlangan va bosqin ostida qolgan davlat armiyasi himoyaga kirishgancha ancha joy egallab olingan.

    1. V va Z epikirovkalari. 2022-yil 24-fevral kuni Rossiya armiyasi Ukrainaga bostirib kirar ekan, ruslar harbiylar kiyimiga va harbiy texnikalarga V va Z epikirovkalarini yozib olgan edi.

    Ma’lumki Gitler Germaniyasi armiyasida shoxi qayrilgan xoch (卐) tamg‘asi keng qo‘llanilgan. Bundan tashqari natsistlar V harfidan ham ekipirovka sifatida keng foydalangan. Ruslarning lotin alifbosidagi ikkita harfdan keng foydalangani o‘shani esga soladi.

    Rossiya mudofaa vazirligi Rossiya armiyasining Ukrainaga bosqin davrida V va Z harflaridan foydalanishini izohlagan. Unga ko‘ra Z harfi “Za pobedu” (g‘alaba uchun) so‘zlarini ifodalaydi. V harfi esa, “Sila v pravde” (kuch haqiqatda) so‘zlarini anglatadi.

    Nima bo‘lganda ham ruslarning ikkita harfdan ekipirovka sifatida foydalanishini nemislarning shoxi qayrilgan xoch (卐) tamg‘asi va V harfidan foydalanganini eslatdi.

    Nemis zobitining formasi. Unda V harfi tushirilgan
    1. Va’dalarda turmaslik. 1938-yilda Gitler agar Chexoslovakiya nemislar yashaydigan Sudet viloyatini Germaniyaga topshirsa bu mamlakatga hujum qilmasligini aytadi. Biroq ko‘p o‘tmasdan va’dasini buzadi va Chexoslovakiyaga bostirib kiradi.

    Xuddi shunga o‘xshash, Putinga u hokimiyatga kelgan 2000-yildan buyon juda ko‘p marta Qrimni Rossiya olishi ehtimoli, Rossiyaning Ukraina sharqini egallashi mumkinligi haqida savollar berishgan.

    U ana shu savollarga har safar Rossiya Ukraina hududiy yaxlitligini buzmasligini, xalqaro normalarga rioya qilishini, Qrim Ukrainaniki bo‘lib qolishini, hech qachon qo‘shni davlatga bostirib kirmasligini ta’kidlab kelgan. Biroq 2014 va 2022-yillarda u ana shu va’dalarini buzdi. Rossiya armiyasi avvaliga Ukraina sharqiga bostirib kirdi. Keyin Qrimni egalladi. Oxir-oqibat 2022-yil 24-fevralda Ukrainaga qarshi keng ko‘lamli urush ochdi.

    1. Soxta referendumlar. Gitlerning bosqinchiligi 1938-yil 12-mart kuni Germaniya armiyasining Avstriyaga bostirib kirishi bilan boshlangandi. Nemislar bu mamlakatni uch kunning ichida to‘liq egallaydi. Shundan so‘ng Avstriyada soxta referendum o‘tkaziladi va uning “natijasi”ga ko‘ra Avstriya Germaniyaga qo‘shilgani e’lon qilinadi.

    Xuddi shunday ishni Rossiya 2014-yilda Qrimda amalga oshirdi. Avval Qora dengiz bo‘yidagi harbiy bazalarda bo‘lgan harbiylar Qrimni bosib olishdi. So‘ng bu yerda ham 1938-yilda Avstriyada bo‘lgani kabi soxta referendum o‘tkazildi. Uning “natijasi”ga ko‘ra Qrim Rossiyaga qo‘shilgani e’lon qilindi.

    Qrimda yarimorolning Rossiyaga qo‘shilishiga qarshi bo‘lganlarning namoyishi

    Rossiya Ukraina hududidagi bunday referendumlarni 2022-yil 24-fevralda bu davlatga bostirib kirgandan so‘ng keyin ham o‘tkazdi.

    Jumladan, bosqin boshlangandan yetti oy o‘tib, 2022-yil 23—27-sentyabr kunlari Ukrainaning to‘rtta viloyati — Donesk, Lugansk, Xerson va Zaparojeda soxta referendumlar o‘tkazdi. So‘ng ana shu referendumlar natijalarini ro‘kach qilib, o‘sha viloyatlarni Rossiyaga qo‘shib oldi.

    Hozirgi kunda Rossiya qonunlariga ko‘ra Ukrainaning yuqorida nomlari keltirilgan to‘rtta viloyati va Qrim Rossiya hududi hisoblanadi.

    So‘nggi so‘z o‘rnida... Yuqorida gapni 1938-yildagi Chexoslovakiya va hozirgi Ukraina o‘xshash bosqinga duch kelgani haqidagi gap bilan boshlagandik. Bu ikki davlat taqdirida biroz farq bor ekan. 1938—1939-yillarda Chexoslovakiya to‘liq nemislar okkupatsiyasi ostida qolgandi. Ukraina bilan bunday ish yuz bermadi. Garchi urush boshlanganiga uch yildan oshgan bo‘lsa-da ukrainaliklar xalqaro hamjamiyat va G‘arb davlatlari yordamida hozircha o‘z mustaqilligini munosib himoya qilib turibdi.

    G‘ayrat Yo‘ldosh tayyorladi.

    22 iyul, 17:45   Izoh (0)   875
    Facebook Twitter LinkedIn Telegram Email
    #Gitler#Germaniya#Ukraina#Sovet Ittifoqi#Rossiya

    Izoh (0)

    Kirish
    Javob qoldiring Bekor qilish

    ×Lightbox Image

    Daryo.uz | Sizning muammoingiz yechimi


    Mirzo Ulug‘bek tumanida joylashgan yirik ko‘chmas mulk auksionga qo‘yildi


    “Euromoney” talqinida “O‘zsanoatqurilishbank” O‘zbekistonning eng yaxshi banki deb e’tirof etildi


    Yandex Music’da jazirama kayfiyat uchun maxsus “Chilla” bo‘limi paydo bo‘ldi


    President Tech Award tanlovida ishtirok etish uchun arizalar qabuli uzaytirildi 


    Biznes va tadbirkorlik oliy maktabi magistratura dasturlariga qabul jarayonlari davom etayotganini ma’lum qiladi


    “O‘zbekinvest” sug‘urta kompaniyasi 2025-yilning I yarim yilligi yakunlarini eʼlon qildi


    Visa Kapitalbank bilan Xitoyga: WeChat Pay va Alipay orqali naqd pulsiz to‘lovlar – erkin, oson va xavfsiz


    Qulay shartlar bilan yangi ipoteka mahsuloti va xonadon yutib olish imkoniyati


    GETWORK — Yevropada ishlash orzusini amalga oshiradigan ishonchli agentlik


    “Tadbirkorlikni rivojlantirish kompaniyasi” ISO 9001 va ISO 37001 xalqaro sertifikatlarini qo‘lga kiritdi 


    Katta o‘zgarishlar kichik qadamlar bilan boshlanadi


    Navoiy innovatsiyalar universiteti 2 milliard so‘mlik grant dasturini e’lon qildi 


    Kia Sonet va ADM Global: O‘zbekiston avtomobil klasterini mahalliylashtirilishiga qariyb 260 mln AQSH dollari miqdorida sarmoya


    “Biznesni rivojlantirish banki” 2025 yilda 138 mingdan ortiq fuqaro bandligini ta’minladi


    Mobiuz — 8 milliondan ortiq abonentlar tanlovi 

     

    Tavsiya etamiz

    Nildan Frot daryosigacha: maxfiylikdan tobora reallikka aylanib borayotgan “Katta Isroil” konsepsiyasi

    22 iyul, 12:22

    KGB soxtalashtirgan jinoyat – SSSR parchalanishi arafasida o‘lim jazosi berilgan qariya kim edi?

    21 iyul, 21:06

    Titanlar to‘qnashuvi: g‘arb burguti kuchlimi yoxud sharq ajdari?

    21 iyul, 19:50

    Favvorada cho‘milayotgan, muzqaymoqqa navbatda turgan odamlar, maysada uxlayotgan it-mushuklar — Toshkentda chilla

    21 iyul, 14:05
     
     
     

    So‘nggi yangiliklarga o‘tish

    Yarim yilda yoqilg‘i-energetika sohasiga yetkazilgan 758 mlrd so‘m zarar undirildi — Bosh prokuratura

    O‘zbekiston | 23 iyul, 00:00

    “Obama, Klinton va Baydenni jinoiy javobgarlik kutmoqda” — Tramp

    Dunyo | 22 iyul, 23:50

    “So‘nggi kunlardagi issiq ob-havo 70 foizga yaqin aholi uyqusiga salbiy taʼsir qilmoqda” — iqlimshunos

    O‘zbekiston | 22 iyul, 23:35

    O‘zbekiston DXX raisi Kobulda “Tolibon” mudofaa vaziri bilan uchrashdi

    O‘zbekiston | 22 iyul, 23:19

    Afg‘oniston janubida bolalar o‘yinchoqlarini sotish taqiqlandi

    Dunyo | 22 iyul, 22:50

    Namanganda 82 marta qoida buzgan haydovchining mashinasi jarima maydoniga joylashtirildi

    O‘zbekiston | 22 iyul, 22:35
    Daryo About Us

    “Daryo” internet-nashrining (O‘zbekiston matbuot va axborot agentligi (O‘zMAA, hozirgi O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi) tomonidan 13.03.2015 yil sanasida 0944-sonli guvohnoma bilan ommaviy axborot vositasi sifatida ro‘yxatga olingan. Matnli materiallarni to‘liq ko‘chirish yoki qisman iqtibos keltirishga, shuningdek, fotografik, grafik, audio va/yoki videomateriallaridan foydalanishga “daryo.uz” saytiga giperhavola mavjud bo‘lgan va/yoki “Daryo” internet-nashrining muallifligini ko‘rsatuvchi yozuv ilova qilingan taqdirda yo‘l qo‘yiladi. Chop etiladigan ba’zi ma’lumotlar 18 yoshga to‘lmagan foydalanuvchilarga mo‘ljallanmagan bo‘lishi mumkin. Info@daryo.uz

    Telegram Youtube Facebook Instagram Twitter vkontakte

    © «Simple Networking Solutions» MChJ, 2013–2025

    Yosh bo‘yicha cheklov

    Xato topdingizmi? Ctrl+Enter’ni bosing

    • Foydalanish shartlari
    • Maxfiylik siyosati
    • Reklama
    Nimani qidiramiz?

    Sign In or Register

    Xush kelibsiz!

    Tizimga kiring yoki Roʻyxatdan oʻting.

    Google

    yoki E-Pochta orqali

    Izoh qoldirishingiz, Foydalanish shartlari va Maxfiylik siyosati shartlarini qabul qilganingizni anglatadi

    Roʻyxatdan oʻting

    Roʻyxatdan oʻtganmisiz? Login.

    Google

    yoki E-Pochta orqali

    Sizga parol elektron pochta orqali yuboriladi.

    Izoh qoldirishingiz, Foydalanish shartlari va Maxfiylik siyosati shartlarini qabul qilganingizni anglatadi

    Matnda xato topdingizmi?

    ×

    Rahmat. Biz sizning xabaringizni oldik va xatoni imkon qadar tezroq tuzatamiz.