Shavkat Mirziyoyev rasmiy tashrif doirasida 5-fevral kuni Malayziya Islom san’ati muzeyida bo‘ldi.
Prezident matbuot xizmatining xabar qilishicha, ushbu majmua mamlakatning eng yirik muzeylaridan biri hisoblanadi. U 1998-yilda tashkil etilgan. Muzey an’anaviy islom me’morchiligi uslubida barpo etilgan bo‘lib, uning umumiy maydoni 30 ming kvadrat metrdan ziyodni tashkil etadi. Bino gumbazining ichki qismini bezash va restavratsiya ishlarida o‘zbekistonlik ustalar ishtirok etgan.
Bu yerda 10 mingdan ortiq islom san’ati namunalari saqlanmoqda. Doimiy ekspozitsiyada Qur’on qo‘lyozmalarining noyob to‘plami, sopol va qimmatbaho buyumlar, qurol-yarog‘ namunalari va inshootlar maketlari, taqinchoqlar, tangalar va boshqa ashyolar namoyish etilmoqda.
-Wkdds9a1.jpg)
Muzey fondida zamonaviy O‘zbekiston hududida turli tarixiy davrlarda yaratilgan 200 ga yaqin noyob eksponatlar alohida o‘rin egallaydi. Ular orasida o‘rta asrlarga oid qo‘lyozmalar, zargarlik buyumlari, mashhur abr matolari va kiyim namunalari, Sharq Renessansiga oid kulolchilik buyumlari mavjud.
Davlat rahbari eksponatlarni ko‘zdan kechirish chog‘ida birgalikda tadqiqotlar o‘tkazish va ko‘rgazmalar tashkil etish, ilmiy va madaniy almashinuvni kengaytirish muhimligini ta’kidladi.
Shavkat Mirziyoyevning Malayziyaga tashrifi
Shavkat Mirziyoyev Malayziya bosh vaziri Anvar Ibrohimning taklifiga binoan 4-fevral kuni kechqurun rasmiy tashrif bilan ushbu mamlakatga yetib bordi. Prezident aeroportda Malayziya parlamenti spikeri bilan uchrashuv o‘tkazdi. Bo‘lajak oliy darajadagi uchrashuvlar kun tartibi yuzasidan fikr almashildi.
5-fevral kuni Kuala-Lumpur shahridagi “Perdana Putra” hukumat majmuasida 5-fevral kuni Shavkat Mirziyoyevni rasmiy kutib olish marosimi bo‘lib o‘tdi. Marosimdan so‘ng Shavkat Mirziyoyev va Malayziya bosh vaziri Anvar Ibrohim tor doirada va rasmiy delegatsiyalar ishtirokida muzokara o‘tkazdi. Unda O‘zbekiston—Malayziya sherikligini innovatsion rivojlantirish davrini boshlashga kelishildi. Muzokaralar yakunida Strategik sheriklik yo‘lida ikki tomonlama hamkorlikni chuqurlashtirish to‘g‘risida qo‘shma bayonot va bir nechta bitimlar imzolandi.
Izoh (0)