Italiyaning Kampi-Flegrey supervulqoni hududida seysmik faollikning kuchayishi olimlarni xavotirga solmoqda. Bu haqda Daily Mail xabar berdi.
So‘nggi olti oy ichida bu hududda 3000 dan ortiq zilzila qayd etilgan, 2025-yil may oyida esa so‘nggi 40 yildagi eng kuchli 4,4 magnitudali silkinish sodir bo‘lgan. Kampi-Flegrey qadimgi vulqon otilishlar natijasida hosil bo‘lgan keng kalderadir. Vulqon oxirgi marta 1539-yilda faollik ko‘rsatgan.
Olimlar ogohlantirishicha, supervulqonning uyg‘onishi global halokatli oqibatlarga olib kelishi mumkin. Buning oqibatida sayyora “xaosga tushadi”. To‘g‘ridan-to‘g‘ri xavf zonasida 4 milliondan ortiq odam, jumladan, Neapol aholisi qolishi mumkin.
Kul chiqindilari Yevropaning katta qismini qoplashi mumkin, bu esa aviareyslarning ommaviy bekor qilinishiga va havo aloqasining izdan chiqishiga sabab bo‘ladi. Bundan tashqari, atmosferaga chiqariladigan moddalar quyosh nurini to‘sib qo‘yishi natijasida butun dunyo bo‘ylab sovuq va iqlim halokatlarini keltirib chiqarishi kutilmoqda.
Vulqonshunoslar hozirgi faollik muqarrar falokatni anglatmasligini ta’kidlagan. Ularning hisob-kitoblariga ko‘ra, joriy o‘n yillikda kuchli otilish ehtimoli 1-3 foizdan oshmaydi. Biroq, ushbu ulkan vulqon faoliyatidagi eng kichik o‘zgarishlar ham global oqibatlarga olib kelishi mumkin. Shu sababli bu olimlar va hukumat vakillaridan jiddiy e’tiborni talab qiladi.
Izoh (0)