AQSH tomonidan qo‘llab-quvvatlanadigan G‘azo gumanitar jamg‘armasi (G‘GJ) G‘azo sektoriga yordam tarqatishni boshlaganini ma’lum qildi. Bu haqda Fox News xabar berdi.
G‘GJ oziq-ovqat miqdori haqida ma’lumot bermagan, ammo ta’minot o‘z markazlariga yetib borganini va butun mintaqa bo‘ylab taqsimlanayotganini aytgan. Tashkilot, shuningdek, 28-may kuni yana ovqat to‘la yuk mashinalari kelishini ta’kidlagan.
“G‘azo sektoriga insonparvarlik yordami kirishini osonlashtirish bo‘yicha olib borilayotgan sa’y-harakatlar doirasida so‘nggi haftalarda Qo‘shma Shtatlar bilan yaqin muvofiqlashtirilgan holda to‘rtta yordam tarqatish markazi tashkil etildi,” deyiladi Isroil Mudofaa kuchlari bayonotida.
Tashkilot ishga tushishidan oldin katta to‘siqqa duch kelgan: yordam tarqatilishi boshlanishidan bir necha soat oldin tashkilot rahbari ishdan bo‘shagan. G‘GJ ijrochi direktori bo‘lgan Jeyk Vuds 26-may kuni tashkilot insoniylik, betaraflik, xolislik va mustaqillikning insonparvarlik tamoyillariga rioya qila olmasligini ta’kidlab lavozimidan voz kechgan.
“Men Isroilni G‘azoga yordam ko‘rsatishga chaqiraman. Barcha manfaatdor tomonlarni esa kechiktirmasdan, chalg‘itmasdan yoki kamsitmasdan yordam ko‘rsatishning innovatsion yangi usullarini izlashni davom ettirishga chorlayman. HAMASning barcha garovga olinganlarni ozod qilishiga, harbiy harakatlarni to‘xtatishga va mintaqada tinchlik o‘rnatilishiga ishonaman”, degan Vuds.
Jamg‘arma yordamida tashkil etilayotgan to‘rtta yordam markazning barchasi Isroil harbiy pozitsiyalariga yaqin ekani hamda uchtasi falastinliklar kam bo‘lgan uzoq janubda joylashgani hisobiga tanqidlarga uchragan. Birlashgan Millatlar Tashkiloti va yordam guruhlari ham bu tashkilotni tanqid qilmoqda.
BMTning Gumanitar masalalarni muvofiqlashtirish boshqarmasi vakili G‘GJni “zarur narsadan chalg‘ishdir”, deb fikr bildirgan.
Izoh (0)