Vazirlik va idoralardagi komplayens-nazorat tizimini yanada kuchaytirishga qaratilgan prezident qarori loyihasi tayyorlanmoqda. Bu haqda Korrupsiyaga qarshi kurashish agentligi direktori Akmal Burxonov ma’lum qildi, deya xabar bermoqda “Daryo” muxbiri.
![](/static/2024/06/12/Screenshot_2-HjH89HIL.jpg)
Biz davlat idoralarida korrupsiyaga qarshi kurashish bo‘yicha uncha-muncha davlatda yo‘q tizimga erishdik. Ya’ni komplayens-nazoratning samaradorligini baholayapmiz, kurashmasa, choralar ko‘rilyapti.
Yuzdan ortiq idoralarda komplayens-nazorat tuzilmalari tashkil etildi. Ular tomonidan ish qilinyapti, choralar ko‘rilyapti. Lekin bu yetarli darajada emas. Masalan, komplayens-nazorat xodimining o‘sha idora bo‘ysinuvida bo‘lgani va boshqa sabablari ham bor. Shuning uchun biz prezident qarori loyihasini ishlab chiqdik. Bunda komplayens-nazorat tuzilmalariga ko‘proq mustaqillik berish va ularning mas’uliyatini oshirish ko‘zda tutilgan. Bundan tashqari, korrupsiya xavfi yuqori bo‘lgan davlat idoralaridagi komplayens-nazorat tuzilmalarini tajriba sifatida agentlik xodimlaridan tayyorlash nazarda tutilmoqda.
Bu hujjat barcha vazirlik va idoralar bilan kelishildi. Hozirgi kunda qaror loyihasini hukumat bilan takomiliga yetkazyapmiz, — dedi agentlik rahbari.
Uning qo‘shimcha qilishicha, mazkur hujjat prezident tomonidan imzolanadigan bo‘lsa, komplayens-nazorat tizimida katta o‘zgarish bo‘ladi.
Ma’lumot uchun, 2021-yil 1-oktyabrdan boshlab barcha davlat organlari va tashkilotlari, shu jumladan, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklarida mavjud shtat birliklari doirasida korrupsiyaga qarshi ichki nazorat tuzilmalari faoliyati yo‘lga qo‘yilgan.