Вазирлик ва идоралардаги комплаенс-назорат тизимини янада кучайтиришга қаратилган президент қарори лойиҳаси тайёрланмоқда. Бу ҳақда Коррупцияга қарши курашиш агентлиги директори Акмал Бурхонов маълум қилди, дея хабар бермоқда “Дарё” мухбири.
![](/static/2024/06/12/Screenshot_2-HjH89HIL.jpg)
Биз давлат идораларида коррупцияга қарши курашиш бўйича унча-мунча давлатда йўқ тизимга эришдик. Яъни комплаенс-назоратнинг самарадорлигини баҳолаяпмиз, курашмаса, чоралар кўриляпти.
Юздан ортиқ идораларда комплаенс-назорат тузилмалари ташкил этилди. Улар томонидан иш қилиняпти, чоралар кўриляпти. Лекин бу етарли даражада эмас. Масалан, комплаенс-назорат ходимининг ўша идора бўйсинувида бўлгани ва бошқа сабаблари ҳам бор. Шунинг учун биз президент қарори лойиҳасини ишлаб чиқдик. Бунда комплаенс-назорат тузилмаларига кўпроқ мустақиллик бериш ва уларнинг масъулиятини ошириш кўзда тутилган. Бундан ташқари, коррупция хавфи юқори бўлган давлат идораларидаги комплаенс-назорат тузилмаларини тажриба сифатида агентлик ходимларидан тайёрлаш назарда тутилмоқда.
Бу ҳужжат барча вазирлик ва идоралар билан келишилди. Ҳозирги кунда қарор лойиҳасини ҳукумат билан такомилига етказяпмиз, — деди агентлик раҳбари.
Унинг қўшимча қилишича, мазкур ҳужжат президент томонидан имзоланадиган бўлса, комплаенс-назорат тизимида катта ўзгариш бўлади.
Маълумот учун, 2021 йил 1 октябрдан бошлаб барча давлат органлари ва ташкилотлари, шу жумладан, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларида мавжуд штат бирликлари доирасида коррупцияга қарши ички назорат тузилмалари фаолияти йўлга қўйилган.