Toshkent shahrining Shota Rustaveli ko‘chasida avtobuslar tezkor harakatlanishi uchun BRT yo‘lagi quriladi. Bu haqda bloger Nikita Makarenko xabar berdi.
Obyekt pasporti Shota Rustaveli ko‘chasida o‘rnatilgan. Unga ko‘ra, avtobus yo‘lagi yo‘lning chekkasida emas, balki ilgarigi tramvay izlari kabi yo‘l o‘rtasidan o‘tadi. Bekatlar yo‘lovchilar avtobusga tushib-chiqishi uchun qulay va xavfsiz qilib barpo etiladi.
Loyiha Tashkent Invest va Xitoyning China State Construction kompaniyasi tomonidan amalga oshiriladi. Biroq loyiha borasida hech qanday jamoatchilik muhokamasi o‘tkazilmagan. Shu sababli faollar shahar hayotiga daxldor loyihalar ochiqlanishi, jamoatchilik muhokamasiga qo‘yilishini so‘ramoqda.
“Qaror mutlaqo to‘g‘ri. Muhimi uni amalga oshirishda xato qilmaslik kerak. Aslida, bunday jamoatchilik uchun muhim bo‘lgan loyiha muhokamaga qo‘yilishi, mutaxassislarga ko‘rsatilishi, namoyish etilishi kerak”, deydi Nikita Makarenko.
“Haliyam kech emas. Shaharning hayotiga daxldor loyihalar ochiqlanishi, jamoatchilik muhokamasiga qo‘yilishi, o‘zimizning ekspertlar hamjamiyati bilan bamaslahat ish tutilishi kerak”, deb yozdi Telegram’dagi “Davletov.uz” kanali muallifi Qobil Hidirov.
2024-yil noyabrida Toshkent hokimligi va Xitoyning China State Construction kompaniyasi deyarli 1 milliard dollarlik loyihalar bo‘yicha kelishib olgandi. Uning qariyb 300 mln dollarlik loyihasi doirasida poytaxt yo‘l infratuzilmasi yaxshilanishi kerak, yana 259 mln dollar esa tirbandlikning oldini olish uchun zamonaviy ko‘priklar qurilishi lozim.
Transport vaziri Ilhom Mahkamov joriy avtobus yo‘laklari yo‘l harakati muntazamligi muammosini hal qilish uchun “tezkor yechim”ligini, to‘liq BRT avtobus tizimi haqida gapirilsa, ajratilgan yo‘lakdan, buning uchun maxsus yo‘lakdan tashqari, maxsus to‘xtash joylari va piyodalar o‘tish joylari kerak bo‘lishini aytgandi.
Urganch shahrida shunday alohida yo‘lakda harakatlanuvchi tezyurar avtobuslar yo‘lga qo‘yilishi rejalashtirilgandi.
Toshkent shahriga tramvay harakati qaytarilishi ham mumkin. Prezident fuqarolardan bu borada ko‘plab xatlar va murojaatlar kelayotganini aytgandi.
Izoh (0)