Tayvan mudofaa vazirligi mamlakatda ishlab chiqilgan Land Sword II tizimining ilk jangovar sinovi muvaffaqiyatli o‘tganini ma'lum qildi. Jarayon davomida tizimning dronlar va qanotli raketalarga qarshi samaradorligi tekshirildi.
Vazirlik tomonidan X (sobiq Tvitter) tarmog‘ida e'lon qilingan bayonotda uchta TC-2 raketasi uchirilgani, ularning hammasi ham belgilangan nishonlarni muvaffaqiyatli urib tushirgani haqida so‘z boradi.
Tayvan qurolli kuchlari 43-artilleriya qo‘mondonligi komandir o‘rinbosari, polkovnik He Hsiangining so‘zlariga ko‘ra, mashg‘ulot jangovar tayyorgarlik va taktik joylashuv mezonlarini baholash maqsadida o‘tkazilgan.
“Jangovar tayyorgarlik — bu doimiy holat, mashg‘ulot esa real jang demakdir,”, degan u.
Land Sword II Qo‘shma Shtatlarning eskirib borayotgan MIM-72 Chaparral tizimiga voris sifatida ishlab chiqilgan. Har bir kompleks tarkibida radar, raketa uchirish platformasi, boshqaruv punkti va o‘q-dori tashuvchi mashina mavjud.
Raketa 15 km masofadagi nishonlarni urishga qodir bo‘lib, har qanday ob-havo sharoitida ishlay oladi. U tez harakatlanuvchi samolyotlar, uchuvchisiz uchish apparatlari va qanotli raketalarga zarba berishi mumkin.
Tayvan rasmiylariga ko‘ra, Land Sword II tizimi orolning ko‘p bosqichli havo mudofaa tizimidagi bo‘shliqni to‘ldiradi. Ayniqsa, qirg‘oq va oldingi hududlarni past uchuvchi tahdidlardan himoyalashga yordam beradi.
Izoh (0)