O‘zbek shou-biznesi vakillari ichida hali turmushga chiqmagan san’atkor qizlar soni oz emas. Quyida oq otdagi shahzodasini kutayotgan xonanda, aktrisa va blogerlar bilan tanishamiz.
Manzura Yo‘ldosheva 47 yosh
Manzura va yosh aktyorning sevgi qissasi ijtimoiy tarmoqlarda keng tarqalyapti. Bir necha oydan buyon Manzura o‘zidan 20 yosh kichik aktyor Murod Yo‘ldoshev bilan birga ko‘rinish bergan videolarida to‘y mavzusi ko‘tarilgan. Manzuraning “To‘y harakatidamiz” degan hazil aralash videolaridan so‘ng Murod Manzuraning qo‘lini so‘ragani aks etgan videolar ham Instagram sahifalariga joylashtirildi.
Videoda qo‘lida gul bilan turgan Murod Yo‘ldoshevni Manzura urishib bergan va “Nima qilganingiz bu, onangiz tengi ayol bo‘lsam?” deya aktyorni hovuzga itarib yuborgan. Shundan so‘ng aktyor undan uzr so‘rash maqsadida Manzuraning uyi oldida romantik kecha uyushtirib, “Azizim” qo‘shig‘ini kuylab berib, sevgilisidan kechirishini so‘radi.
Hozirda ularning munosabatlari davom etmoqda, ammo bu shunchaki piar bo‘lishi ehtimoli ham oz emas.
Iroda Nosirova 43 yosh
Teleboshlovchi va aktrisa Iroda Nosirova ham hali o‘z baxtini uchratmagan aktrisalardan. U bolaligidan kech turmushga chiqish xayoli bilan yashaganini aytadi.
— Menga nega haligacha turmushga chiqmagansiz degan savolni juda ko‘p berishadi. Bizda, o‘zbeklarda, qiz bola voyaga yetgandan keyin darrov uzatib yuborishadi. 25 ga chiqqandan so‘ng qari qiz deyishadi. Menda yoshligimdan kech turmushga chiqaman, degan xayol bo‘lgan. Negaligini o‘zim ham bilmayman — shunchaki shunday fikr bo‘lardi. Voyaga yetib dugonalar turmush qurgach, ularning hayoti, turmushi qanday kechayotganini ko‘rasiz, bilasiz. Shularni ko‘rganimdan keyin turmushga chiqish menda keyingi rejalarga o‘tib qolgan. Turmush qurishdan qo‘rqib qolganman, deydi aktrisa.
Oydin Yusupova 41 yosh
Kinoda bir vaqtlar mashhurlikka erishib, keyin ijodi sokinlashgan aktrisa Oydin Yusupova ham turmushga chiqmagan aktrisalardan.
Oydin va shoir Ahad Qayum haqidagi gap-so‘zlar odamlar orasida ovoza bo‘lgandi. Ahad Qayum aktrisa bilan iliq munosabatda ekanligini bildirsa, Oydin uning so‘zlarini inkor etardi. Hatto aktrisa Ahad Qayum undan piar uchun foydalangani va nomini bulg‘agani haqida aytib o‘tgandi.
Mahfuza Sherboyeva 37 yosh
O‘zbek sanʼatidagi birinchi ayol qiziqchi yolg‘izlikni his qilishi haqida ko‘p gapiradi.
— Karyera deb oiladan voz kechdim. Ammo o‘ylab qarasam, uchrashuvlarga chiqib yurgan qiz ham emasman. Balki, hammasi niyatga bog‘liqdir. Chunki oldindan avval sanʼatda o‘z o‘rnimni topaman, tarixda qolib, keyin oila quraman deb niyat qilardim. Do‘st-dugonalarim ko‘p, ammo baribir ular oilaning o‘rnini bosolmas ekan. Karantin paytida Toshkentda qoldim. Aksiga olib, kovidga chalingan va juda uzoq vaqt kasalxonalarda davolandim. Shu paytda oila qurishim, turmush o‘rtog‘im va farzandlarim bo‘lishi kerakligi haqida o‘yladim. Bekorga onalar qizlarini erta turmushga berishga shoshilmas ekan. Yoshi katta bo‘lgandan keyin inson tanlarkan. Turmush o‘rtog‘im mendan kuchli bo‘lishini, ko‘p pul topishini va aqlli inson bo‘lishini orzu qilaman. Sumkamni ko‘tarib, topganimga sherik bo‘ladigan er kerak emas, deydi Mahfuza Sherboyeva.
Yulduz Rajabova 35 yosh
Yil so‘ngida 36 bahorni qarshilaydigan aktrisa Yulduz Rajabovaning shaxsiy hayoti doimgidek sokin. Faqatgina bundan ikki yil avval “Mendirman Jaloliddin” serialining taqdimot marosimida aktrisaning bosh rol ijrochisi Emre Kiviljim bilan o‘rtasida o‘zaro iliq, do‘stona va samimiy munosabatlar borligi ko‘zga tashlangandi.
Emre 2023-yilda o‘zbek jurnalisti bilan bo‘lgan intervyusida “Yulduzga bo‘lgan sevgingiz tugadimi?” degan savolga “Ishq bitmas, u mozorga qadar”, deb javob bergandi.
Ammo Yulduz Rajabova so‘nggi intervyusida Emre bilan faqat do‘stona munosabatda bo‘lganini va ularning birga suratga tushishi haqida tarqalgan gap-so‘zlar haqiqatdan yiroq ekanini aytdi.
Biz do‘stona quchoqlashib, loyiha bilan birga tabriklaganmiz. Bularning barchasi noto‘g‘ri talqin qilindi. Hozirda esa yuragim bo‘m-bo‘sh, deydi Yulduz.
Feruza Normatova 36 yosh
Mahoratli aktrisa Feruza Normatova bu yil 33 yoshni qarshilaydi. U ham hamon oila qurgani yo‘q. Aktrisaning Shahzod Sultonov bilan yaqinligi haqida gap-so‘zlar tarqalgandi. Ammo hozircha to‘ydan darak yo‘q.
— Alloh nasib etgan kun oila quraman. Qiz bolalar nimani niyat qilsa, shu sodir bo‘lar ekan. Avvaldan uy-joyli bo‘lib, singillarimni turmushga berib, keyin oila qurishni niyat qilardim. Xuddi shunday bo‘lyapti. Muhimi, bolalarim zoriqib qolishini, bugun oila qurib, bir yildan keyin “bir-birimizga mos kelmadik”, deb ajrashib ketishni istamayman, — deydi aktrisa Feruza Normatova.
Barchin G‘ofurova 35 yosh
Aktrisa va teleboshlovchi Barchin G‘ofurovaga o‘zidan yosh yigit Sohib Rahmatullayev turmush qurish taklifini bergan. Ular hozirda juftlik sifatida ijtimoiy tarmoqqa video joylab keladi. Barchin G‘ofurova uni partnyorim deb ataydi.
Barchin G‘ofurova bolaligida otasi ularni tashlab ketgani va holidan biror marta xabar olmagani uchun erkaklardan ko‘ngli qolganini aytadi. Shu sababli oila qurishdan ham qo‘rqaman, degan u.
U yaqin kunlarda partnyori Sohib Rahmatullayev Umra safariga yo‘llanma sovg‘a qildi. Juftlik Umra safarini ado qilib qaytdi. Ammo ularning munosabati kuzatuvchilarini o‘ylantiradi — ular haqiqatan ham turmush quradimi yoki bu shunchaki piar?
Shahlo Ahmedova 30 yosh
Xonanda Shahlo Ahmedova ham hozircha oila qurmagan. Hamisha ijodi kabi sirli bo‘lishga intiladigan ijodkor shaxsiy hayotini ham ommadan yashiradi. Xonanda hali hech kimni sevib qolmagani haqida shunday degan:
“Sevib qolmaganman hali, sevgidan kuyish tuyg‘usi men uchun tushunarsiz”.
Luiza Rasulova 30 yosh
Aktrisa Luiza Rasulova bu yil 30 yoshni qarshilaydi. Aktrisa ham shu paytgacha oila qurmagan. Luiza so‘nggi paytlarda film va seriallarda suratga kam tushyapti. U o‘zining shaxsiy brendiga asos solgan bo‘lib, ayollar go‘zalligiga hissa qo‘shuvchi biofaol qo‘shimchalar sotuvini yo‘lga qo‘ygan.
Gulruh Pirnazarova 30 yosh
Teatr aktrisasi va teleboshlovchi Gulruh Pirnazarova ham hali turmushga chiqmagan aktrisalardan. Ammo ko‘pgina hamkasblaridan farqli ravishda uning shaxsiy hayoti turli gap –so‘zlardan yiroq.
Maftuna Shokirova 30 yosh
Instabloger va aktrisa Maftuna Shokirova oq otdagi shahzodasini kutayotgan blogerlardan.
— Intervyularimdan birida turmushga chiqsam, Ozod aka bilan ijodni to‘xtataman, deganman. Lekin hamkorlikni ular to‘xtatdilar. Demak, turmushga chiqmayapman, deydi Maftuna.
Jasmin (Madina Fayzullayeva) 28 yosh
Asl ismi Madina bo‘lgan xonanda Jasmin ham hali oila qurmagan sanʼatkorlardan. Uning shaxsiy hayoti haqida deyarli hech qanday gap-so‘zlar yo‘q.
U shu yilning yanvar oyida “Yangi O‘zbekiston yulduzlari” milliy mukofoti taqdirlash marosimida “Yilning eng yaxshi estrada ayol xonandasi” nominatsiyasi bilan taqdirlandi. Bundan tashqari “Kelajak bunyodkori” medali bilan ham mukofotlandi. Uning “Kumush nolasi”, “Sevganlari bor”, “Jonim”, “Siz yaxshi-yu biz yomon” kabi qo‘shiqlari noodatiy yo‘nalishga egaligi bilan ajralib turadi.
Aysanem Yusupova 28 yosh
“O‘zbek qizi” filmi orqali tanilgan qoraqalpoq aktrisa Aysanemxon hozirda yangi kino va seriallarda suratga tushish bilan band. U o‘zini batamom ishga bag‘ishlagan.
Muborak Abdullayeva 27 yosh
Instabloger Muborak Abdullayeva ham hali turmushga chiqmagan qizlardan.
— Hozir ko‘proq taqdir haqida o‘ylayman. Shu yigitga turmushga chiqasan deyishsa, indamay ko‘nib ketadigan 18 yoshli qiz emasmiz. Turmush quradigan inson bilan dunyoqarashimiz bir-biriga to‘g‘ri kelishi kerak. Shu sabab tanlov jarayoni qiyinlashib qoladi. Turmush o‘rtog‘im bilan do‘st bo‘laylik, yaxshi-yomon taraflarimizni bilaylik, to‘ydan keyin o‘zimizdan kimnidir “yasab” olmaylik, ungacha hammasidan boxabar bo‘laylik, deb yoshligimdan niyat qilaman.
Durdona Qurbonova 27 yosh
Bundan bir necha yillar avval aktrisa Durdona Qurbonovaning xonanda Imron bilan ishqiy munosabatlari haqida gap-so‘z tarqalgandi. Ammo ularning ikkisi ham bu gaplar asossiz ekanligi haqida aytishgan. Bundan so‘ng xonanda Imron 2021-yilda boshqa qizga uylangan va turmush o‘rtog‘ini ikki yil kutganini aytgan.
Rayhon Asadova 25 yosh
Yosh aktrisa Rayhon Asadova ham kelinlikka nomzodlardan biri.
Bir necha yil avval aktrisaning Sardor Toirov bilan iliq munosabatlari haqidagi gap-so‘zlarga Rayhon xonandaning bir nechta kliplarida suratga tushgani sabab bo‘lgan. Ular “Baxtingni top”, “Sevmasam” va “Hasrat” kabi kliplarda sevishgan juftlik rolini ijro etishgan. Balki ularning hayotda birga bo‘lishlarini muxlislari ko‘proq istashgandir. Ammo ijodkorlar mish-mishlar asossiz, ular faqatgina ijodiy hamkor ekanliklarini bildirib o‘tishgan. Sardor Toirov 2022-yilning bahorida boshqa qizga uylandi.
Zarina Yo‘ldosheva 24 yosh
Asl kasbi raqqosa bo‘lgan Zarina Yo‘ldosheva ham kelinlikka nomzodlarda yana biri. Uning Shahzod Sultonov munosabatlari ko‘p marta muhokamalarga sabab bo‘lgan. Ammo Zarina hozir aktyor haqida gapirishni istamasligini aytadi.
— U haqida gapirishni istamayman. Iltimos, menga u aktyor haqida hech qanday savollarni bermanglar. Nimadir bilmoqchi bo‘lsangiz, uning o‘zidan so‘rang, deydi intervyularida aktrisa.
Bundan tashqari 39 yoshli komik aktrisa Anjelika Esimbetova, asosan salbiy qahramonlarni gavdalantiruvchi 33 yoshli aktrisa Jayrona Husanova va 29 yoshli instabloger Mahzunabonu (Imona) Ahmedova ham hali turmush qurmagan qizlardan.
Izoh (0)