“Million” jamoasi sardori Davron Kabulov YouTubedaga “Daryo lifestayle” kanaliga bergan intervyusida ijtimoiy tarmoqlarda negativ fikr bildirayotgan, jamoa sahnada ko‘rsatolmaydigan hazillar va uning sinishini kutganlar haqida gapirdi.
— Ijtimoiy tarmoqlarda xeyterlari ko‘p insonlar bor. Ulardan biri aktrisa Luiza Rasulova. Qiziqib uning video va suratlari ostiga yozilgan izohlarni ko‘rib chiqdim. O‘qib, ularning bari taqvodor insonlar bo‘lsa kerak, deb o‘ylab qoldim. Savol tug‘iladi, agar taqvoyingiz kuchli bo‘lsa, Luiza Rasulovaning sahifasida nima qilib o‘tiribsiz? Axir taqvoli inson bunday kontentdan o‘zini chegaralashi kerak-ku. “Sahifasiga kirib, uni qarg‘ab chiqib ketganingizdan nima maʼno bor? Axir qarg‘ash taqvoli insonning tabiatiga xos emas-ku”, degim keldi. Agar izoh qoldirayotgan insonlar Luizani yoki boshqa birovni isloh qilishmoqchi bo‘lishsa, shaxsiy xabar yo‘llab, mo‘min odam kabi chiroyli qilib tushuntirishsin. U gapingizga oshiq bo‘lib, yurish-turishini o‘zgartirsin. Deputatning Instagram sahifasi ham “balchiqqa qorilib yotibdi”. Abror Muxtor Alining sahifasida ham xuddi shu ahvol. Hamma xeyter, negativ kayfiyat ustun. Hammani so‘kib ustidan mag‘zava ag‘darishayotganini ko‘rib, o‘zi jamiyatimizda hurmat qilinadigan birorta odam qoldimi, deb o‘ylab qolaman, deydi Davron Kabulov.
Davron Kabulov jamoaning tomoshalarida nimalarga cheklov qo‘yishi haqida ham gapirib o‘tdi.
— Yengil tabiatli qizlar hayoti bilan bog‘liq holatlarni achchiq kulgiga olayotgan paytda yigitlarga “Ehtiyot bo‘linglar, bu targ‘ibot bo‘lib qolmasin”, deb tayinlayman. To‘g‘ri, aysh-ishratga berilgan, giyohvandlarning achinarli hayoti haqidagi chiqishlarimiz bor. Ammo birortasida moddalarning isteʼmol jarayonini ko‘rsatmaymiz. Ko‘rayotgan tomoshabin oqibati qanday bo‘lishini kulgi orqali his qiladi, xolos deydi Davron Kabulov.
Davron Kabulov “Million”ning sinishini istaganlar, dushmanlari ichida ekani va avvalgi jamoadoshlarini allaqachon kechirib yuborgani haqida gapirdi.
— Hozir atrofimizda shunday insonlar borki, ular eng qiyin vaziyatimizda “dushman” tomonda edi. Hozir esa biz tomonda yuribdi. To‘g‘ri, ular jamoamda emas, ammo shu atrofda yurganini bilaman. Shukrki, Yaratgan bizni 6 yil davomida uyaltirib, sharmanda qilib qo‘ymadi. O‘tgan yillar davomida “Kim aslida kim?” degan savolga tomoshabin bilan birga ikki tomon ham javobini oldi.
Men hech bir insondan xafa emasman, ustimizdan yozgan, yarim yo‘lda tashlab ketganlarning ham hammasini kechirdim. Aslida adovatsiz ijod qilish maroqli. “Million”ning sinishini kutganlar ko‘p bo‘ldi, hatto yonimga kelib “Ular zo‘r bo‘lib ketadi”, deganlar ham bo‘lgan.
Ishlayman, degan insonlar bilan loyiha davom etaveradi. Ammo miyasi aynigan odam ish bermaydi va jamoaga nifoq solishni, ishlamasdan pul topishni istaydi. Bunaqa insonlar jamoa uchun nihoyatda xatarli, deydi Davron Kabulov.
Izoh (1)
Сан тақволи бўлсанг нимага Луиза мавзусини санъат саройига олиб чиқасан. Ўзинг уларни лайфхак қилиб танитишга ҳисса қўшиб чиқасану, халққа қараб сизлар унақа қилманглар деб ўтирасан, ўзингча шустрик бўласан