“Dok-1 Maks” ishi bo‘yicha ayblanib, 18 yil muddatga ozodlikdan mahrum qilingan Sardor Kariyevning ochiqqa chiqishi, tayinlangan jazoning uy qamog‘iga o‘zgarishi uchun jabrlanuvchilarga 76 milliard so‘mga yaqin tovon puli to‘lab berilishi va’da qilingandi. Farmagentlik sobiq rahbarining onasi Munira Kariyeva sudda qatnashib, ushbu pullarni aytilgan muddatda to‘lashga tayyorligini, faqat o‘g‘liga nisbatan qo‘llangan jazo uy qamog‘iga o‘zgarishidan umidvorligini aytdi. Bu haqda sudning 2024-yil 14-iyun kuni davom etgan navbatdagi majlisida so‘z bordi.
Ikki-uch yilda men aytilgan pulni to‘lab beraman. Faqat bitta iltimosim shuki, o‘g‘limga nisbatan qo‘llangan qamoq ehtiyot chorasini uy qamog‘iga o‘zgartirib bersangiz, men qaror chiqqan kundan boshlab pulni to‘lashni boshlayman, — dedi Munira Kariyeva.
Sardor Kariyevning onasi 70 nafarga yaqin jabrlanuvchining har biriga dastlab 100 million so‘mdan to‘lab berishini, bu pullar jabrlanuvchilarga ikki hafta davomida to‘liq to‘lanishini aytdi.
Shuningdek, sudga grafik berganman. Qolgan pullarni aynan o‘sha grafik bo‘yicha to‘lab beraman. Bu gaplarimni Ommaviy axborot vositalari vakillari barchaga yetkazishlarini so‘rayman va men bu pullarning o‘z vaqtida yuz foiz to‘lab berilishini kafolatlayman, — dedi Kariyevning onasi.
Munira Kariyeva sudda shuningdek, jabrlanuvchilarning qonuniy vakillariga yuzlanib, ularning bu masala yuzasidan barcha savollariga javob berishga tayyorligini, ulardan talab qilinadigani esa bir yoqadan bosh chiqarib, ayni paytda qidiruvda bo‘lgan Sachin Jainning javobgarlikka tortilishi uchun kurashishda ko‘mak berishlarini iltimos qildi.
Advokatlarimiz xalqaro miqyosda ish olib borib, sirop ishi bo‘yicha asosiy aybdor — Sachin Jainning jazoga tortilishi uchun harakat qilishmoqda. Shu ishda bizga ko‘mak berib, yonimizda turishingizni iltimos qilar edik, — dedi sudlanuvchining onasi.
Sudda ishtirok etayotgan jabrlanuvchilarning qonuniy vakillari Munira Kariyevaning so‘zini to‘liq qo‘llab-quvvatlashini, ularga farzandlarini davolatish uchun ayni paytda pul juda zarurligini aytib, “Sardor Kariyevga uy qamog‘i qo‘llanishiga qarshi emasmiz. Uning qamalishidan foyda yo‘q, muhimi, bizga mablag‘ to‘lab berilsa, bolalarimizni o‘z vaqtida davolatsak, shu eng muhimi”, — dedi.
Munira Kariyeva, shuningdek, o‘g‘li Sardor Kariyev Farmagentlik rahbari bo‘lib ishlagan kezlari soha uchun katta ish qilganini, shu sabab soha vakili sifatida ham, ona sifatida ham o‘g‘lidan minnatdorligini bildirdi.
Avvalroq O‘zbekistondagi yirik mahalliy ishlab chiqaruvchi korxona Jurabek laboratories ta’sischisi, Sardor Kariyevning onasi Munira Kariyeva O‘zbekistonda eng kamida 68 nafar bolaning o‘limi va 16 nafar bolaning nogiron bo‘lib qolishiga olib kelgan “Dok-1 Maks” jabrlanuvchilariga sud tomonidan belgilangan 75 milliard 756 million so‘m miqdoridagi ma’naviy zararni to‘lab berish taklifi bilan chiqqani haqida xabar berilgandi. Keyinchalik ular dastlabki to‘lov sifatida 7,5 milliard so‘m to‘lovni birdaniga amalga oshirishni rejalashtirgani, shunda bu pullar 72 nafar jabrlanuvchiga birinchi oy uchun 100 million so‘mdan, 4 nafar jabrlanuvchiga 50 va 8 nafar jabrlanuvchiga 20 million so‘mdan tegishi ma’lum bo‘ldi.
Izoh (0)