“Док-1 Макс” иши бўйича айбланиб, 18 йил муддатга озодликдан маҳрум қилинган Сардор Кариевнинг очиққа чиқиши, тайинланган жазонинг уй қамоғига ўзгариши учун жабрланувчиларга 76 миллиард сўмга яқин товон пули тўлаб берилиши ваъда қилинганди. Фармагентлик собиқ раҳбарининг онаси Мунира Кариева судда қатнашиб, ушбу пулларни айтилган муддатда тўлашга тайёрлигини, фақат ўғлига нисбатан қўлланган жазо уй қамоғига ўзгаришидан умидворлигини айтди. Бу ҳақда суднинг 2024 йил 14 июнь куни давом этган навбатдаги мажлисида сўз борди.
Икки-уч йилда мен айтилган пулни тўлаб бераман. Фақат битта илтимосим шуки, ўғлимга нисбатан қўлланган қамоқ эҳтиёт чорасини уй қамоғига ўзгартириб берсангиз, мен қарор чиққан кундан бошлаб пулни тўлашни бошлайман, — деди Мунира Кариева.
Сардор Кариевнинг онаси 70 нафарга яқин жабрланувчининг ҳар бирига дастлаб 100 миллион сўмдан тўлаб беришини, бу пуллар жабрланувчиларга икки ҳафта давомида тўлиқ тўланишини айтди.
Шунингдек, судга график берганман. Қолган пулларни айнан ўша график бўйича тўлаб бераман. Бу гапларимни Оммавий ахборот воситалари вакиллари барчага етказишларини сўрайман ва мен бу пулларнинг ўз вақтида юз фоиз тўлаб берилишини кафолатлайман, — деди Кариевнинг онаси.
Мунира Кариева судда шунингдек, жабрланувчиларнинг қонуний вакилларига юзланиб, уларнинг бу масала юзасидан барча саволларига жавоб беришга тайёрлигини, улардан талаб қилинадигани эса бир ёқадан бош чиқариб, айни пайтда қидирувда бўлган Сачин Жаиннинг жавобгарликка тортилиши учун курашишда кўмак беришларини илтимос қилди.
Адвокатларимиз халқаро миқёсда иш олиб бориб, сироп иши бўйича асосий айбдор — Сачин Жаиннинг жазога тортилиши учун ҳаракат қилишмоқда. Шу ишда бизга кўмак бериб, ёнимизда туришингизни илтимос қилар эдик, — деди судланувчининг онаси.
Судда иштирок этаётган жабрланувчиларнинг қонуний вакиллари Мунира Кариеванинг сўзини тўлиқ қўллаб-қувватлашини, уларга фарзандларини даволатиш учун айни пайтда пул жуда зарурлигини айтиб, “Сардор Кариевга уй қамоғи қўлланишига қарши эмасмиз. Унинг қамалишидан фойда йўқ, муҳими, бизга маблағ тўлаб берилса, болаларимизни ўз вақтида даволацак, шу энг муҳими”, — деди.
Мунира Кариева, шунингдек, ўғли Сардор Кариев Фармагентлик раҳбари бўлиб ишлаган кезлари соҳа учун катта иш қилганини, шу сабаб соҳа вакили сифатида ҳам, она сифатида ҳам ўғлидан миннатдорлигини билдирди.
Аввалроқ Ўзбекистондаги йирик маҳаллий ишлаб чиқарувчи корхона Журабек лабораториэс таъсисчиси, Сардор Кариевнинг онаси Мунира Кариева Ўзбекистонда энг камида 68 нафар боланинг ўлими ва 16 нафар боланинг ногирон бўлиб қолишига олиб келган “Док-1 Макс” жабрланувчиларига суд томонидан белгиланган 75 миллиард 756 миллион сўм миқдоридаги маънавий зарарни тўлаб бериш таклифи билан чиққани ҳақида хабар берилганди. Кейинчалик улар дастлабки тўлов сифатида 7,5 миллиард сўм тўловни бирданига амалга оширишни режалаштиргани, шунда бу пуллар 72 нафар жабрланувчига биринчи ой учун 100 миллион сўмдан, 4 нафар жабрланувчига 50 ва 8 нафар жабрланувчига 20 миллион сўмдан тегиши маълум бўлди.
Изоҳ (0)